1 Gwee Mlungu, wantu wa maisi gamonga wayikankala isi yaku.

Wayitula humba numba Nkulu yaku nanagala

na kugutenda mji gwa Yerusalemu kuwera mahami.

2 Waleka mauti ga wantumintumi waku wazilii wampongu,

nshimba za wantu waku ziweri shiboga sha wankanyama wa kuntundu.

3 Wita mwazi gwawu handa mashi,

kuzyengeta wega zoseri za Yerusalemu,

pota kwahera gwa kuwafintira.

4 Tuwera shintu sha kulikangasha kwa wapakwegera watwenga,

wapakwegera wetu wankutubeziya na kutujongera.

5 Gwee Mtuwa Mlungu, hagukalali mashaka goseri?

Maya gaku ga weya hagayaki handa motu mpakandii?

6 Guwakalaliri wantu wa maisi yagakujimirandiri,

na falme zoseri zyazijimirandiri litawu lyaku.

7 Mana wawalaga wantu wa Yakobu,

wahalibisiya nakamu pahala pakuyi pa kulikala.

8 Nagulihola vidoda vya watati wetu.

Lusungu lwaku lutwizili kalongola,

mana twahera litumbiru!

9 Gwee Mlungu, mlopola gwetu,

toziya ya uweru wa litawu lyaku gutulopoli na kutulekiziya vidoda vyetu,

toziya ya ligoya lya litawu lyaku.

10 Ntambu gaa maisi gatugambili,

kakoshi Mlungu gwenu?

Gututendi tuwoni paguwakomanga wantu wa maisi

kwajili ya malaga ga wantumintumi waku.

11 Kulira kwa watatirwa awa kukusokeri,

kwa likakala lyaku likulu guwavuguliri yawatozitwi kuhowa.

12 Gwee Mtuwa Mlungu, guwawuziliri maisi gapakwegera mara saba,

toziya ya mahingirangu gawakwigiriti!

13 Natwenga wantu waku,

yatuwera kondolu wa maliwuziwu gaku,

hatulongi mayagashi mashaka goseri,

na kukuzyuma viyiwuku mpaka viyiwuku.