1 Gwee Mlungu gwangu na mfalumi gwangu, hanikukwisi,

hanilikwisi litawu lyaku mashaka goseri.

2 Hanikutekeleri kila lishaka,

hanilizyumi litawu lyaku mashaka goseri.

3 Mtuwa Mlungu ndo mkulu, yakafiruwa zyuma zivuwa,

ukulu wakuyi ulolwalolwandiri.

4 Zyuma za matendu gaku hazitambirwi kulawa wiwuka mpaka wiwuka,

wantu hawabweri matendu gaku makulu.

5 Hantakuli kuusu uweru na ukulu waku,

hanigaholi matendu gaku ga kulikangasha.

6 Wantu hawabweri ukulu wa matendu gaku ga kulikangasha,

naneni habweri ukulu waku.

7 Hawaliholi ukulu wa uherepa waku hawakuzyumi

hawakwimbiri kwajili ya uaminika waku.

8 Mtuwa Mlungu ndo yakana lusungu na kalekaziya,

kakalalandiri kalongola na kamema ufiru.

9 Mtuwa Mlungu ndo mheri kwa wantu woseri,

kana lusungu kwa viwumbi vyakuyi vyoseri.

10 Gwee Mtuwa Mlungu, viwumbi vyaku vyoseri havilongi mayagashi,

na waminika waku hawakutekeleri.

11 Hawalongi kuusu ukwisa wa ufalumi waku,

na kubwera kuusu likakala lyaku likulu,

12 su kila muntu kavimani matendu gaku makulu,

na uweru mkulu wa ufalumi waku.

13 Ufalumi waku ndo ufalumi wa mashaka goseri,

ukolamlima waku ulikala wiwuka woseri.

Mtuwa Mlungu ndo mwaminika kwa galii goseri gakalongiti,

ndo muheri mumatendu gakuyi goseri.

14 Mtuwa Mlungu kawatanga woseri yawaguwa

kawanyasula woseri yawayonelitwi.

15 Viwumbi vyoseri vikutumbira gwenga,

na gwenga guvipanana viboga vyawu kwa shaka shakuyi.

16 Gukuzumla liwoku kuwapanana,

kila shiwumbi gushikutiziya kwa shilii shakashifira.

17 Mtuwa Mlungu ndo mwaminika munjira zakuyi zoseri,

ndo yakana haki mumahengu gakuyi goseri.

18 Mtuwa Mlungu kapakwegera na woseri yawamshema,

woseri yawamluwa kwa moyu mwaminika.

19 Kawapanana nfiru zawu zoseri yawamguwira,

kapikinira kulira kwawu na kuwalopola.

20 Mtuwa Mlungu kawaloleraga woseri yawamfira,

kumbiti hakawagamiziyi wakontola woseri.

21 Habweri zyuma za Mtuwa Mlungu,

na woseri yakawawumbiti walizyumi litawu lyakuyi linanagala,

mashaka goseri.