1 Nikutugira gwee Mtuwa Mlungu,

nasoniziwi nakamu,

kwa waminika waku gundopoli.

2 Gumpikaniri, gundopoli kalongola!

Guweri kwaneni litalabuyi lya uponeru,

guweri liboma ligangamala lya kundopola.

3 Gwenga ndo litalabuhi lyangu na liboma lyangu,

kwa utanga waku gunonguziya na kundolera.

4 Gumbusii mmugomiziwu gwawantegiriti,

toziya gwenga ndo tugira ya uponera waneni.

5 Mmawoku mwaku ntula rohu yaneni,

gundopoli, gwee Mtuwa Mlungu,

Mlungu mwaminika.

6 Niwakalalira yawaguwira wamlungu wamonga,

ilaneni nikutumbira gwenga Mtuwa Mlungu.

7 Hanemeleri na kufyapilira utanga waku,

toziya gwenga guwona utama wangu na ntabika yaneni.

8 Gundekandiri mbatwi na wankondu waneni,

gungolusiya pahala pa uponeru.

9 Gwee Mtuwa Mlungu gumoneri lusungu,

namuntabisiwu,

masu gangu gatoka kulira,

mperuwa likakala mushimba na murohu.

10 Makaliru gangu gapera kwa kuhinginika,

navinja vyangu kwa kulalama.

Makakala gangu gapera kwa vidoda,

ata mihonju yangu yahera makakala.

11 Wankondu woseri waneni wankumbeziya,

ata wapakwegera waneni wamona nashihoja.

Wera tiriziwu kwa waganja waneni,

pawamona munjira wantira.

12 Wandwaluwa handa muntu yakahowiti,

wera handa shiwiga shashipandika.

13 Mpikinira wantu pawalininitira,

visoweru vyakutiriziya vilawa kila uwega,

wantulira mipangu ya kundaga.

14 Gwee Mtuwa Mlungu, kumbiti neni nikutumbira gwenga,

ntakula, gwenga ndo Mlungu gwangu!

15 Makaliru gangu gammawoku mwaku,

gundopoli na wankondu waneni,

gundopoli na awa yawansakula.

16 Gundoli kwa lusungu neni ntumintumi gwaku,

gundopoli kwa utanga waku.

17 Gwee Mlungu nagundeka nsoniziwi,

kumbiti guwaleki wakontola wasoniziki,

guwaleki wagendi kuzimu na wanyamali jii.

18 Guyinyamaziyi miromu ya wanampayu,

miromu yayiyowera madoda kwa wantu yawatenda maheri,

miromu yayiwera na mtiti na yawaliwona.

19 Ntambu yaluwera luvuwa lusungu lwaku,

yaguwatuliliti walii yawakuguwira!

Yawakutugira gwenga

hawapati maheri, wantu woseri pawawona.

20 Guwafifa pahala poneka paguwera,

walikala kutali na mipangu midoda ya wantu,

guwatula poneka muulolera waku,

kutali na visoweru vya lusoziya vya wankondu wawu.

21 Kazyumwi Mtuwa Mlungu,

toziya kananguziya utanga wakuyi kwa ntambu ya makangashu,

pazyengetitwi na wankondu.

22 Ntiriti na kulishera handa guweriti gunasa,

kumbiti, gupikaniriti kulira kwa neni

panikushemiti guntangi.

23 Mmufiri Mtuwa Mlungu, mwenga wananagala wakuyi woseri.

Mtuwa Mlungu kawaloleraga wantu waaminika,

kumbiti kawakomanga nakamu yawanamtiti ntambu yawafiruwa kutendwa.

24 Muweri wagangamala na mkamalili,

mwenga yamumtumbira Mtuwa Mlungu.