1 Handa mbawala ntambu yakanahamu na mashi ga shishemba,

ndontambu yananahamu na gwee Mlungu gwangu!

2 Nanahamu kuwera pakwegera na Mlungu, Mlungu yakawera mkomu.

Hansokindii kwakuyi na kumwona kayi?

3 Masozi gawera shiboga shangu paluwala na pashiru,

pawang'ambiriti kila lishaka,

"Kakoshi Mlungu gwaku?"

4 Nilihola kayi mirandu ayi kwa hinginika momuyu mwaneni,

ntambu yaweriti na wantu wavuwa, paniwalonguziya kugenda ukaya kwa Mlungu

pawataga nsheka za mayagashi,

wantu wavuwa pawatenda msambu gunanagala!

5 Mbona hinginika hangu mmoyu?

Ntambu gaa moyu gwangu gwankugazika?

Hanimtimbili Mtuwa Mlungu, mana hanimkwisi kayi,

yomberi yakawera mtanga gwangu

na Mlungu gwangu.

6 Nshenyiwa na hinginika mmoyu mwangu,

hangu hanikuholi gwenga,

gwee Mtuwa Mlungu, kulawa aku Yoridani,

kulawa aku lugongu Herimoni na Mizari.

7 Lushemba lwana mashi gagenda lushema lumonga, mpikanira liziwu lya mbutu zyaku zya mashi

malawa gaku na makupala gaku ga mashi gandibiziya.

8 Mtuwa Mlungu hakananguziyi ufiru wakuyi paluwala,

naneni nimwimbiri lwimbu lwa zyuma pashiru,

nimluwi Mlungu gwa ukomu.

9 Nimgambira Mlungu, litalabuhi lyangu,

"Mbona gundyaluwa?

Hashi ng'endi aku na aku pandaya

kwa kuwonelwa na wankondu wangu?"

10 Ntendwa na mahigiranga gawu,

pawankosiya kila lishaka,

"Kakoshi, Mlungu gwaku?"

11 Mbona hinginika hangu mmoyu?

Ntambu gaa moyu gwangu gwankugazika?

Hanimtimbili Mtuwa Mlungu, mana hanimkwisi kayi,

yomberi yakawera mtanga gwangu

na Mlungu gwangu.