1 Gwee moyu gwangu, gumzyumi Mtuwa Mlungu,

rohu yaneni yoseri ilizyumi litawu lyakuyi linanagala!

2 Gwee moyu gwangu, gumzyumi Mtuwa Mlungu!

Nagulyaluwa uheri wakuyi woseri.

3 Ndo yakalekeziya ukontola waneni woseri,

na kumponiziya malweri gangu goseri.

4 Ndo yakandopola kulawa mkuhowa,

na yakakupanana ufiru na lusungu.

5 Ndo yakamemiziya maheri makaliru gaku goseri,

su guwera kayi muntemba yakana likakala handa kapungu.

6 Mtuwa Mlungu katenda mirandu ya haki,

na katoza kwa haki wantu yawawonerwa.

7 Kamgambiriti Musa njira yakuyi,

kawalanguziyiti wantu wa Israeli matendu gakuyi.

8 Mtuwa Mlungu ndo yakana ufiru na lusungu,

ndo mhepelera na mvuwa gwa ufiru.

9 Katukalapiragandiri mashaka goseri,

Mlungu kakalalandiri mashaka goseri.

10 Katukomangandiri ntambu yaviwera vidoda vyetu,

katuwuzilirandiri teratera na ukontola wetu.

11 Handa liyera ntambuyaliwera kutali na pasipanu,

ndo ntambuyawuwera ufiru wakuyi kwa wantu yawamtira.

12 Handa kwagulawa mshenji ntambu yakuwera kutali na kwaguzyeta mshenji,

ndo ntambu yakavitula gweka vidoda vyetu kutali na twenga.

13 Handa tati ntambu yakawera na lusungu kwa wana wakuyi,

ndo Mtuwa Mlungu ntambu yakawawonera lusungu woseri yawamguwira.

14 Mlungu kavimana ntambu yakatuwumbiti,

kalihola handa twenga ndo madikudiku.

15 Kumbiti makaliru ga muntu ndo handa ntundu hera,

gabuma handa uluwa mlirambu,

16 lyega livuma pambindi pakuyi na lyeni lyagamira,

na pahala paliweriti hapeni liwoneki kayi.

17 Kumbiti ufiru wa Mtuwa Mlungu ulikala mashaka goseri,

kwa woseri walii yawamguwira,

na uaminika wakuyi ulikala viyiwuku vyoseri,

18 Kwa woseri yawatulaweri lipatanu lyakuyi,

na kulihola kujimira lagalira zakuyi,

19 Mtuwa Mlungu katula shiti shakuyi sha ukulu kumpindi,

yomberi kakolamlima pampindi pa vintu vyoseri.

20 Mumzyumi Mtuwa Mlungu mwenga wantumintumi wakuyi wakulu yamwana makakala,

mwenga vikambaku yamjimira lagiru zakuyi

na kutenda shilii shakatakula!

21 Mwenga lishonta lyoseri lya kumpindi, mmuzyumi Mtuwa Mlungu,

mwenga wantumintumi wakuyi yamtenda vyakafira yomberi.

22 Mmuzyumi Mtuwa Mlungu mwenga viwumbi vyakawumbiti vyoseri,

mmuzyumi kila pahala pakakolamlima.

Gwee moyu gwangu, gumzyumi Mtuwa Mlungu!