1 Gwee Mtuwa Mlungu,

gulangaziya upenderewu muisi yaku,

guwawuziya walopolwa kwa Yakobu.

2 Guwalekeziya wantu waku ukontola wawu,

guwusiya vidoda vyawu vyoseri.

3 Gugalewelera maya gaku goseri,

guwuya na kuleka ukalipa waku.

4 Gwee Mlungu mlopola gwetu gutuwuziliri makakala kayi,

gugawusiyi maya gaguwera naga kwa twenga.

5 Hashi, hagutukalaliri mashaka goseri?

Hashi, hagwendeleyi kuwera na maya kwa viyiwuku vyoseri?

6 Hashi hapeni gutupanani kayi ukomu,

su wantu waku wakunemeleri?

7 Gwee Mtuwa Mlungu gutulanguziyi ufiru waku yawuhera na upeleru,

gutupanani ulopola waku.

8 Hanishipikiniri shakatakula Mlungu yakawera Mtuwa Mlungu,

mana katakula kuwapanana ponga wantu wakuyi,

kumbuti weni nawawuyira uzigizigi.

9 Nakaka kakala kuwalopola yawamguwira,

na uweru wakuyi uweri muisi ya twenga mashaka goseri.

10 Ufiru na waminika haviliwoni,

haki na ponga haviweri pamuhera.

11 Waminika hawutomoli muisi,

haki hayisuluki kulawa kumpindi.

12 Nakaka Mtuwa Mlungu hakatupanani shashiwera shiheri,

na isi ya twenga hayilaviyi mabenangu mavuwa.

13 Haki hayilongoleri kulongoleru kwakuyi,

na kunyawa njira toziya yakuyi.