1 Gutupikiniri, Gwee Mshungaji gwa Israeli,

yaguwalonguziya wiwuka wa Yosefu handa shipinga sha wakondolu.

Gwee yagulikala pashiti sha ukulu pakati pa viumbi vyana mbapatiru, gutulangalili,

2 kulongolu kwa Efraimu, Benjamini na Manasi.

Gulanguziyi likakala lyaku

gwizi kutulopola!

3 Gwee Mlungu gutuwuziyi,

gutuloli kwa lusungu lwaku na kutulopola.

4 Gwee Mtuwa Mlungu, Mlungu gwa Mashonta,

mpaka ndii hagugakalaliri maluwa ga wantu waku?

5 Gutupanana libumunda lya masozi,

gutulandaziya masozi gavuwa.

6 Gututenda tuweri beziwu kwa wapakwegera wetu,

wankondu wetu wankutujongera.

7 Gwee Mlungu gwa mashonta, gutuwuziyi,

gutuloli kwa lusungu lwaku na kutulopola,

8 Gujegiti mzabibu kulawa Misri,

guwawinga wantu wa maisi gamonga,

na kuguyala muisi yawu.

9 Gugulimiriti su gukuli,

na gulaviyi mishigira na kweneya muisi yoseri.

10 Guyigibikiriti migongu kwa shivuni shakuyi,

na ntambi zakuyi zigibika mierezi mikulu.

11 Ntambi zakuyi zyeneya mpaka kubahali,

ntomoleru zakuyi mpaka kumpeku kulushemba.

12 Mbona gubomoliti vibambaza vyavizyengekiti?

Vinu kila yakapita kapa zabibu zakuyi,

13 mtumbi gwa kuntundu kanguguhalibisiya,

na wankanyama wa kuntundu wankugumemena!

14 Gwee Mlungu yagwana likakala gutuwuyiri,

guloli kulawa kumpindi, guwoni.

Guguloleri mzabibu agu,

15 guloleri lushigira lwaguyaliti kwa liwoku lyaku lya kumliwu,

mwana mpalu yagumtenditi gangamala kwajili yaku gamweni.

16 Mzabibu gudumulitwi na kulunguziwa,

guwakalipili na guwagamiziyi.

17 Liwoku lyaku liweri pampindi pa ulii yagumsyaguliti,

pampindi pa ulii yagumgangamaziyiti kwajili yaku gamweni.

18 Hapeni tukuleki,

gutupanani ukomu na twenga hatukuzyumi.

19 Gwee Mtuwa Mlungu, Mlungu Yagwana Makakala gutuwuziyili makakala,

gutuloli kwa lusungu lwaku na gutulopoli.