Zabuli 64

Luwa ya ulolera

1 Gwee Mlungu, gupikanili kulalama kwaneni,

gugaloleri makaliru gangu kulawirana na ntiliziwu za wankondu.

2 Gundoleri na mipangu ya bada ya wadoda,

kulawirana na shipinga sha wantu wakontola.

3 Wankukuwa milimi yawu gambira ligumba,

wayowera visoweru vikalipa handa misali.

4 Kulawa mumafifu wamkomanga muntu mwaminika,

wankumkomanga vumu pota kutira.

5 Wankulipanana moyu mumipangu yawu idoda,

wankupatana ntambu ya kufifa migomiziwu yawu.

"Pawalihola kuwera kwahera yakaweza kuyiwona."

6 Watenda mipangu yawu ya ukontola na kulonga.

"Vinu tumalira mipangu yetu."

Nakaka mipangu ya bada ya muntu ilififa mumoyu mwakuyi.

7 Kumbiti Mlungu hakawagumi misali

na womberi hawatenduwi vumu.

8 Hakawagamiziyi toziya ya visoweru vyawu,

kila yakawawona hakatikisiyi mtuyi kwa hinginika,

9 na wantu woseri hawatiri.

Hawabweri galii gakatenditi Mlungu

na kulihola mirandu yakatenditi.

10 Yawatenda maheri hawamnemeleri Mtuwa Mlungu,

na kutugira kwakuyi,

wantu woseri waminika hawamzyumi.