1 Mlongi mayagashii Mtuwa Mlungu toziya ndo mheri,

mana ufiru wakuyi ulikala mashaka goseri.

2 Mlongi mayagashi kwa Mlungu gwa wamlungu,

toziya ufiru wakuyi ulikala mashaka goseri.

3 Mlongi mayagashii Mtuwa gwa watuwa,

mana ufiru wakuyi ulikala mashaka goseri,

4 yomberi gweka yakuyi yakatenda mawuzawuza makulu,

mana ufiru wakuyi ulikala mashaka goseri,

5 yomberi kawumbiti mpindi kwa mahala gakuyi,

mana ufiru wakuyi ulikala mashaka goseri,

6 yomberi ndo yakatandaziti isi pampindi pa mashi,

mana ufiru wakuyi ulikala mashaka goseri,

7 yomberi ndo yakawumbiti mshenji na lyezi,

mana ufiru wakuyi ulikala mashaka goseri,

8 mshenji guwali paliwala,

mana ufiru wakuyi ulikala mashaka goseri,

9 mwezi na ntondu vilangali pashiru,

mana ufiru wakuyi ulikala mashaka goseri,

10 ndo yakawalagiti wiwuka wa kwanja wa Misri,

mana ufiru wakuyi ulikala mashaka goseri,

11 kawawusiya wantu wa Israeli kulawa Misri,

mana ufiru wakuyi ulikala mashaka goseri.

12 Kwa liwoku lyakuyi lyana likakala na ukulu,

mana ufiru wakuyi ulikala mashaka goseri.

13 Ndo yakayibaguliti Bahari ya Shamu sehemu mbili,

mana ufiru wakuyi ulikala mashaka goseri.

14 Kawapitiziya wantu wa Israeli amu,

mana ufiru wakuyi ulikala mashaka goseri.

15 Kumbiti kawadibisiyiti amu Farao na shonta lyakuyi,

mana ufiru wakuyi ulikala mashaka goseri,

16 ndo yakawalonguziyiti wantu wakuyi kushiwala,

mana ufiru wakuyi ulikala mashaka goseri,

17 ndo yakawakomangiti wafalumi yawana makalala,

mana ufiru wakuyi ulikala mashaka goseri,

18 kawalagiti wafalumi yawamanika,

mana ufiru wakuyi ulikala mashaka goseri,

19 shakapanu kamlagiti Sihoni, mfalumi gwa Waamori,

mana ufiru wakuyi ulikala mashaka goseri,

20 na Ogu, mfalumi gwa Bashani,

mana ufiru wakuyi ulikala mashaka goseri,

21 kawapanana isi wantu wakuyi kuwera uhala wawu,

mana ufiru wakuyi ulikala mashaka goseri,

22 ziweri uhala wa wana wa Israeli, wantumintumi wakuyi,

mana ufiru wakuyi ulikala mashaka goseri,

23 ndo yakatuholiti shaka sha kuwonerwa kwa twenga,

mana ufiru wakuyi ulikala mashaka goseri,

24 katulopola kulawa kwa wankondu wetu,

mana ufiru wakuyi ulikala mashaka goseri,

25 ndo yakashipanana shiboga kila shiwumbi shashiwera shikomu,

mana ufiru wakuyi ulikala mashaka goseri.

26 Mlongi mayagashi kwa Mlungu gwa kumpindi,

mana ufiru wakuyi ulikala mashaka goseri.