1 Iherepa kulonga mayagashii kwa Mtuwa Mlungu na

kulizyumira litawu lyaku, gwenga Yaguwera Kumpindi Nentu,

2 kubwera zyuma zaku mandawira na

waminika waku shaka sha pashiru,

3 kwa zezi na lingutinguti na

kwa liziwu liherepa lya zezi.

4 Gwee Mtuwa Mlungu, matendu gaku ganemiziya,

hanemeleri toziya ya matendu gaku gagutenditi.

5 Gwee Mtuwa Mlungu, matendu gaku makulu nentu!

Maholu gaku gamanikandiri!

6 Muntu mpukapuka kaliholandiri,

pota mzigizigi kavimanandiri mirandu ayi.

7 Tembera wakontola waweza kongereka handa ntundu,

yawatenda makontola waweza kumota,

kumbiti upeleru wawu ndo kwangamiziwa mashaka goseri,

8 kumbiti gwenga Mtuwa Mlungu, gukwiswa mashaka goseri.

9 Guloli wankondu waku ndo awa

gwee Mtuwa Mlungu wankondu waku, nakaka hawagamiri,

woseri yawatenda makontola, hawapalasiki.

10 Gwenga gunupa likakala handa nyati,

gumintira lipaki liherepa.

11 Masu gangu gawona wankondu wa neni wasinda,

mpikinira kulira kwawu yawatenda makontola.

12 Yawana haki hawaherepi handa mtera gwa mtendi,

hawakuli handa mtera gwa mwerezi gwa Lebanoni,

13 handa mitera yayiyalitwi muligeleri lya Numba Nkulu ya Mtuwa Mlungu,

hawongeleki mumageleri ga Numba Nkulu ya Mlungu gwetu,

14 hayendeleyi kulera mabwajubwaju mpaka uzewi,

mashaka goseri hayiweri miwisi na yayimema makakala.

15 Su wabweri handa Mtuwa Mlungu ndo mwaminika,

litalabuhi lyangu, kwakuyi kwahera mpunjiru.