1 Mumzyumi Mtuwa Mlungu!

Mumwimbili Mtuwa Mlungu lwimbu lwasyayi,

Mumzyumi mulijojoniku lya waminika!

2 Gwee Israeli gunemeleri toziya ya mwumba gwaku,

wantu wa Sayuni mfyapiliri toziya ya mfalumi gwenu.

3 Na walizyumi litawu lyakuyi,

wamwimbili kwa ngoma na zezi.

4 Toziya Mtuwa Mlungu kafiliziwa na wantu wakuyi,

yomberi kawanyasula yawawonerwa kwa kuwalopola.

5 Wantu waminika wanemeleri ligoya ali,

wafyapiliri ata pawawera muvitanda vyawu.

6 Wamzyumi Mlungu kwa kubotanga,

wakola magumba gakalipa wega zoseri mumawoku mwawu,

7 su wawawuziliri wantu wa maisi gamonga,

wawakomangi wantu yawammanandiri Mlungu,

8 wawatawi wafalumi wawu kwa minyololu,

na walonguziya wawu kwa pingu za shuma,

9 su wawatozi ntambu yayilembitwi!

Ali ndo ligoya lya waminika wa Mlungu.

Mumzyumi Mtuwa Mlungu!