1 Pasipanu na vyoseri yaviweraamu ndo vyakuyi Mtuwa Mlungu,

na woseri yawalikala amu ndo lunda yakuyi.

2 Toziya yomberi katuliti pasipanu pampindi pa bahari,

kaigolusiyiti gangamala pampindi pa mashi.

3 Gaa hakakweni kulugongu lwa Mtuwa Mlungu?

Gaa hakalikali muliringu lyakuyi Linanagala?

4 Ndo muntu ulii gwa matendu maheri na moyu guherepa,

yakagugendeziyandiri moyu gwakuyi kutenda mirandu ya shizigizigi,

pota kulirapa kwa upaya.

5 Muntu ayu hakanki ntekelera kulawa kwa Mtuwa Mlungu,

nahakapananwi haki kulawa kwa Mlungu mlopola gwakuyi.

6 Ashi ndo shiyiwuku sha wantu yawamsakula,

yina, wantu yawamsakula Mlungu gwa Yakobu.

7 Mwee migomi mgulosiyi mituwi yenu,

mgolosiyi mituwi mwee migomi ya makashu,

su mfalumi gwa uweru kingiri.

8 Gaa ayu mfalumi gwa uweru?

Ndo Mtuwa Mlungu, kana likakala na uwezu, Mtuwa Mlungu,

yakana uwezu kunkondu.

9 Mgolosiyi mituwi mwee migomi,

mgolosiyi mituwi mwee migomi ya makashu,

su mfalumi muweru kingiri.

10 Ndo gaa ayu Mfalumi muweru?

Ndo Mtuwa Mlungu gwa mashonta,

yomberi ndo Mfalumi gwa uweru.