1 Mlongimayagashii kwa Mtuwa Mlungu, mbweri ukulu wakuyi,

mugamaniziyi maisi mirandu yakatenditi.

2 Mumwimbili na mumzyumi Mtuwa Mlungu,

mtambili matendu gakuyi ga kulikangasha gakatenditi.

3 Mlizyumiri litawu lyakuyi linanagala,

yawamguwira Mtuwa Mlungu wanemeleri.

4 Mumsakuli Mtuwa Mlungu na makakala gakuyi,

msakuli sheni shakuyi mashaka goseri.

5 Mliholi matendu gakuyi ga kulikangasha gakatenditi,

mauzauza gakuyi na toza yakalaviyiti,

6 mwenga wiwuka wa Abrahamu ntumintumi gwakuyi na

mwenga wiwuka wa Yakobu, msyagulwa gwakuyi.

7 Yomberi ndo Mtuwa Mlungu, Mlungu gwetu,

toza zakuyi zyana likakala pasipanu poseri.

8 Yomberi kalikola lipatanu lyakuyi mashaka goseri,

katenda shakalongiti kwa viyiwuku elufu,

9 lipatanu lyakatenditi na Abrahamu,

na shakatakuliti katendi kwa Isaka.

10 Kamlanguziyiti Yakobu kuwera lagalira,

na kwa Israeli kuwera lipatanu lya mashaka goseri,

11 "Pakalonga, haniwapanani isi ya Kanani,"

nayeni hayiweli yenu maweni.

12 Wawaweriti wadidini,

kayi waweriti wadidini nentu na wahenga muisi ya Kanaani,

13 wayeritiyeriti kulawa isi mpaka isi,

kulawa ukolamlima umu mpaka isi imonga.

14 Kumbiti Mlungu kajimirandiri muntu kawawoneri,

toziya yawu kawakalipiliti wafalumi,

15 "Pakalonga namuwashinkula wasyagulwa waneni;

namuwatenda wambuyi waneni."

16 Mtuwa Mlungu kajegiti njala nkulu muisi yawu,

kahalibisiya shiboga shawu shoseri.

17 Kumbiti kamlongoliziyiti muntu yumu kulongolu kwawu,

Yusufu kashuwuzwa kuwera mmanda.

18 Wamtawiti magulu kwa minyololu,

katawalirwa musingu kwa lugoyi lwa shuma,

19 mpaka galii gakalongiti pagatendikiti.

Mpaka shisoweru sha Mtuwa Mlungu pashimlanguziyiti handa muntu gwa nakaka.

20 Shakapanu mfalumi gwa Misri kalagalira wamvuguliri,

mkolamlima gwa wantu kamleka lekeru.

21 Kamtula kaweri mkulu gwa numba yakuyi,

na mkulu gwa lunda yakuyi yoseri,

22 kawalongoziyi wantumintumi wa mfalumi ntambu yakafira,

na kuwafunda luhala wazewi wakuyi.

23 Shakapanu Israeli kingira muisi ya Misri,

Yakobu kawera mhenga muisi ya Hamu.

24 Mtuwa Mlungu kawatenda wantu wakuyi wiwuli nentu,

kawapanana likakala kuliku wankondu wawu.

25 Kawatenda Wamisri wawakalaliri wantu wakuyi.

Yawawatendera madoda wantumintumi wakuyi.

26 Shakapanu kamlagalira Musa ntumintumi gwakuyi,

na Aruni mweni yakamsyaguliti.

27 Watenda langalira za Mlungu pakati pa Wamisri,

na mauzauza muisi ya Hamu.

28 Mlungu kajega luwindu lwalugibikiti isi,

kumbiti Wamisri walemiti kujimira lagalira zakuyi.

29 Kagalambula nshemba zawu kuwera mwazi,

kawalaga wasomba wawu woseri.

30 Malyuli wakangala isi yawu,

ata munumba ya mfalumi wamema.

31 Mlungu kalongiti, kulawira vipinga vya wavinkozi,

na wamala wamema muisi yoseri.

32 Katenditi mvula yawu iweri mvula ya mabuwi,

na lumeta lumetiti muisi yawu yoseri,

33 kahalibisiya mizabibu na mitini yawu,

viraa kayimeganga mtera ya isi yawu.

34 Mlungu kalonga, kulawira wanjombi,

na vibatala yawawalangikandiri,

35 wavimemena vimeru vyoseri muisi,

waliya viboga vyawu vyoseri.

36 Kawalagiti wiwuka wa kwanja muisi yawu,

Wapantanjira wawu wa untemba wawu.

37 Shakapanu kawalaviya wantu wa Israeli muisi,

pawawera na mpiya na zahabu,

pota kwahera ata yumu gwawu yakasigaliti.

38 Wamisri wanemeleliti kuwuka kwawu,

lyoga liwakoliti toziya yawu.

39 Mlungu katuliti liwundi pampindi pa wantu wakuyi,

na motu guwamulikiri pashiru.

40 Waluwiti na yomberi kawajegera wankwali,

kawikutuziya kwa mabumunda kulawa kumpindi.

41 Kapantiti litalabuhi mashi galawa,

ganyililika kushiwala gambira lushemba.

42 Kaliholiti shakatakuliti shinanagala,

shakampanananiti Abrahamu ntumintumi gwakuyi.

43 Kawalaviya wantu wakuyi kwa nemeru,

wasyagulwa wakuyi wimbiti na kufyapilira.

44 Kawapananiti isi za wantu wamonga

na kawapanana malambu ga wenikaya,

45 su wakoli malagalira gakuyi

na kuzijimira lagiru zakuyi.

Kakwiswi Mtuwa Mlungu!