1 Gwee Mtuwa Mlungu,

nikulavalira moyu gwangu;

2 nikutumbira gwenga, gwee Mlungu gwangu,

nagundeka nsoniziki,

wankondu waneni nawanemelera kusinda kwaneni.

3 Nagumleka yakakutumbira kapati soni,

kumbiti wasoniziwi woseri yawakulema kwang'anji.

4 Gumaniziyi njira zaku, gwee Mtuwa Mlungu,

gunfundi nfati gagufira.

5 Gunonguziyi munakaka yaku na kunfunda,

toziya gwenga ndo Mlungu, mlopola gwaneni,

nikutumbira gwenga kila lishaka.

6 Gwee Mtuwa Mlungu, guliholi lusungu lwaku,

na ufiru waku mkulu, wawuweriti kwanjira makashu.

7 Naguhola vidoda vya untemba wa neni

na makosa ganeni ga unkesera,

gunholi kulinganira na ufiru waku,

toziya ya uheri waku, gwee Mtuwa Mlungu.

8 Mtuwa Mlungu ndo mheri na mwaminika,

hangu kawafunda yawana vidoda njira zakuyi.

9 Kawalonguziya wananaga munjira iherepa,

kawafunda awa njira yakuyi.

10 Njira zoseri za Mtuwa Mlungu ndo za ufiru na uwaminika,

kwa walii yawakola lipatanu lyakuyi na malagaliru gakuyi.

11 Gwee Mtuwa Mlungu, toziya ya litawu lyaku,

gundekiziyi shidoda shangu toziya ndo shikulu.

12 Kila muntu yakamguwira Mtuwa Mlungu,

Mlungu hakamfundi njira ya kufata.

13 Muntu gwa ntambu ayi hakafanikiwi mashaka goseri

na wiwuka wakuyi hawaihali isi.

14 Mtuwa Mlungu kawalongoziya walii yawamtira,

yomberi kawamaniziya awa lipatanu lyakuyi.

15 Nimlola Mtuwa Mlungu mashaka goseri kantangi,

na hakagawusiyi magulu gangu mumigomiziwu.

16 Gundoli, gwee Mtuwa Mlungu gumoneri lusungu,

toziya neni na gweka na ntabisiwa.

17 Gumpusiliri magaziwu ga mumoyu mwaneni,

gundopoli kulawa muntabiku zyangu.

18 Guloli ngomangu yangu na ntabiku yaneni,

gundekiziyi vidoda vyangu vyoseri.

19 Guloli ntambu yawawera wavuwa wankondu waneni,

guloli ntambu yawankalalira na kuntenda.

20 Gugaloleri makaliru ganeni gundopoli,

nagujimila soniziwi,

toziya ntugila uponeru kwaku.

21 Uheri na uwaminika vintulaweri,

toziya nikutumbira gwenga.

22 Gwee Mlungu, guwalopoli wantu waku Israeli,

guwalopoli mukutabika kwawu koseri.