1 Kwa Mlungu gweka yakuyi moyu gwangu gwana uponeru,

ulopola wangu ulawa kwakuyi.

2 Yomberi gweka yakuyi ndo litalabuhi na ulopola waneni,

yomberi ndo liboma lyangu, hapeni ntikinyiki.

3 Mpakandii hamunkomangi neni? Mpakandii woseri mwenga mfira kundaga?

Neni yanahera makakala handa shibambaza shashing'ong'onaliti, handa shidiwira shashifira kuguwa.

4 Mpanga kungusiya kulawa pahala pangu pa ukulu,

mnemera kutakula mpayu.

Mntekelera kwa visoweru,

kumbiti mumiyoyu yenu mumpangira.

5 Nimlola Mlungu gweka yakuyi,

kwakuyi ntula litumbiru lyangu.

6 Yomberi gweka yakuyi ndo litalabuhi na ulopola wangu,

na liboma lya neni, hapeni ntinyiki.

7 Ulopola na tumbiru yaneni vilawa kwa Mlungu,

litalabuhi lyangu ligangamala na tugira yaneni ndo Mlungu.

8 Mwenga wantu, mumtumbiri Mlungu mashaka goseri,

mumvuguliri Mlungu vyaviwera mumiyoyu mwenu,

mana Mlungu ndo tugira ya uponera watwenga.

9 Wantu woseri ndo handa pumla hera,

woseri, wakulu na wadidini, wafandiri shintu.

Kayi paguwapima utopa wafika ndiri kilu, woseri pamuhera wayewuka kuliku pumla.

10 Namlitumbira lunda zya uzyanga,

pota namlizyumira vintu vya kwiwa,

tembera lunda pazongereka namzitumbira.

11 Mlungu katakula mrandu gumu,

na neni mpikinira mirandu miwili,

handa makakala ndo gakuyi gweka yakuyi,

12 naufiru ndo waku Mtuwa,

toziya gwenga Mlungu gumlipa kila muntu teratera na matendu gakuyi.