1 Gwee Mtuwa, kwanjira viyiwuku vyoseri,

gwenga guwera uponera wa twenga.

2 Pamberi pa kuwera migongu,

pamberi hagweni umbi pasipanu,

gwenga ndo Mlungu, yagulikala mashaka goseri.

3 Guwawuziya wantu mulitapaka,

gutakula mwenga wantu muwuyi mulitapaka.

4 Kwaku vinja elufu ndo handa lishaka limu hera,

ndo handa lishaka lyalipititi,

ama handa masaa madidini.

5 Guwagamiziya kutali wantu mumpota za kuhowa.

Wantu ndo handa ntundu yayitomola mandawira,

6 mandawira itomola na kubuma,

pashimihi inyala na kuyuma.

7 Maya gaku gatwagamiziya,

tunyamaziwa na maya gaku.

8 Makontola getu gugatula kulongolu kwaku,

vidoda vyetu vya bada vya lupalahera kulongolu kwaku.

9 Kwa maya gaku makaliru getu gawusiwa,

gapera handa pumla.

10 Vinja vyetu vya kulikala ndo sabini,

ama patuwera na likakala, semanini,

kumbiti upuleru wakuyi ndo ntabiku na hinginika,

mashaka gagenda na twenga tuhowa.

11 Gaa yakavimana makakala ga maya gaku?

Toziya ukulu waku ututenda tukutiri.

12 Gutufundi kuwalanga mashaka getu,

su tuwezi kuwera na moyu gwa luhala.

13 Gwee Mtuwa Mlungu guwuyi!

Hagukawawili mpaka ndii?

Gutuwoneri lusungu twenga wantumintumi waku.

14 Gutumemiziyi ufiru waku mandawira,

su tuwezi kwimba kwa nemeleru na kufyapilira mashaka goseri.

15 Gutuwongeri vinja vivuwa vya nemeru,

ntambu yagutupananiti vinja vivuwa vya ntabiku na hinginiku.

16 Gugalangaziyi matendu gaku kwa wantumintumi waku,

uwezu waku kwa wana wawu.

17 Uheri wa Mtuwa, Mlungu gwetu uweri kwa twenga,

gugatekeleri mahengu getu,

gutupanani mpatiru gatugatenda.