1 Gwee Mtuwa Mlungu, kwaku ntugira uponera,

nagundeka nsoniziwi nakamu!

2 Kwa uaminika waku gunkomboli na gumponiziyi.

Gumpikaniri na kundopoli!

3 Guweri litalabuhi lya uponera waneni,

pahala panantugiri kila shaka,

gulagaliri ndopolwi,

mana gwenga litalabuhi lyangu na liboma lyangu

4 Gwee Mlungu gwangu, gundopoli mumawoku mwa wantu wakontola,

kulawa mumikonji mwa wantu wadoda na wankesera.

5 Gwee Mtuwa gwangu, gwenga ndo litumbiru lyangu,

litumbiru lyangu kwanjira untemba waneni.

6 Nikutumbira gwenga kwanjira kwiwuka kwa neni,

ndo yagundaviyiti mumtima mwa mawu gwangu.

Neni hanikuzyumi gwenga mashaka goseri.

7 Kwa wantu wavuwa wera shituku,

kumbiti gwenga guwera tugira ya neni igangamala.

8 Kila shaka mlomu gwangu gumema zyuma zaku na

ukwisa waku paluwala poseri.

9 Pawera mzewi nagunasa,

pampeluwa likakala nagundeka.

10 Mana wankondu waneni wantakulanga,

yawagwandira ukomu wa neni wankutenda mipangu,

11 na kulonga, "Mlungu kamleka,

mmufati na kumbata,

mana kwahera gwa kumlopola."

12 Gwee Mlungu nagulikala kutali na neni,

gwee Mlungu gwangu gwizi kalongola kuntanga.

13 Wankondu wa neni woseri

wasoniziwi na kulaguwa,

woseri yawafira kuntenda neni,

waweri na soni na wasoniziki.

14 Kumbiti neni haweli na matumbiru mashaka goseri,

kayi hanikuzyumi ng'anji.

15 Mlomu gwagu hagutakuli matendu gaku ga ulopola,

mashaka goseri hambweri ukombola waku,

tembera aga gapita mahala gangu.

16 Gwee Mtuwa Mlungu hankanti matendu yaku makulu,

habweri handa gwenga ndo mheri.

17 Gwee Mlungu, gwenga gunfunda kwanjira untemba wangu,

hanendeleyi kubwera matendu gaku ga kulikangasha.

18 Gwee Mlungu nagundeka,

ata pawera mzewi,

guweri na neni mpaka pambweraku makakala gaku mu shiyiwuku ashi,

na shiyiwuku shashiza pa neni kuusu makakala gaku.

19 Gwee Mtuwa likakala na uheri waku, visoki mpaka liyera lya kumpindi.

Gwenga gutenda vitwatira vikulu nentu.

Gwee Mlungu ndo gaa yakawera handa gwenga?

20 Tembera guntenda ntabiki nentu,

kumbiti hagumbuziliri kayi makakala gangu,

gwenga hagunyasuli kayi kulawa kulisembi,

21 Hagunongeleri ligoya lyangu

na kuzyangazyanga kayi.

22 Gwee Mlungu hanikuzyumi kwa shinubi,

toziya ya waminika waku, gwee Mlungu gwangu,

gwenga yaguwera mnanagala gwa Israeli,

hanikwimbiri zyuma kwa lingutinguti

23 Hambotangi kwa nemeleru,

hanukwimbiri zyuma na

na neni hanikuzyumi toziya gundopola.

24 Hantakuli matendu gaku ga haki mashaka goseri,

toziya yawajeriti kuntenda,

wasoniziwa na kufezeheshwa.