1 Mtuwa Mlungu kankukolamlima,

wantu wankulendemera!

Kalikala pampindi pa viwumbi vyana mpapatiru,

na pasipanu pabegiziwa!

2 Mtuwa Mlungu ndo mkulu mu Sayuni,

kapananwa ligoya mu maisi goseri.

3 Woseri na walizyumi litawu lyakuyi likulu lya kutiliziya.

Yomberi ndo Mnanagala!

4 Mfalumi ndo yagwana makakala na gufira uaminika!

Gulanguziya haki yaku,

kwa Yakobo gutenda yagawera ga haki na yagawera teratera.

5 Mumzyumi Mtuwa Mlungu, Mlungu gwetu,

mguwiri kulongolu kwakuyi.

Yomberi Mnanagala!

6 Musa na Aruni waweriti watambika wakuyi,

Samweli kaweriti muwamu mwa yawamshemiti,

wamshemiti Mtuwa Mlungu na yomberi kawapikinira.

7 Kayoweriti nawomberi mumpanda ya liwundi,

Wagatenditi malagalira gakuyi na lagiru zyakawapananiti.

8 Gwee Mtuwa Mlungu, Mlungu gwetu, gwenga guwankuliti,

kwa womberi guweriti Mlungu yakawalekiziya,

tembera guwakomangiti kwa vidoda vyawu.

9 Mmuzyumi Mtuwa Mlungu, Mlungu gwetu,

mguwiri mulugongu lwakuyi lunanagala!

Mana Mtuwa Mlungu, Mlungu gwetu, ndo mnanagala.