1 Mpindi zimbwera ukwisa wa Mlungu,

lyera lilanguziya lihengu lya mawoku gakuyi.

2 Lishaka kwa lishaka lilaviya visoweru,

pashiru papagambira pashiru papiza umani.

3 Kwahera litakulu ama visoweru vyavitumika,

pota liziwu lyalipikinirika,

4 Ata hangu,

liziwu lyawu lyeneya pasipanu poseri na visoweru vyawu visoka mpeleru za pasipanu.

Kulyela Mlungu kagutulira mshenji pahala pakuyi pakulikala,

5 gweni gulawa handa mpalu gwa ndowa pakalawa mushumba mwakuyi,

handa muntu shikambaku gunemerela kufata njira yakuyi.

6 Gulawira uwega wumu,

na kuzyengeta mpaka uwega umonga,

kwahera shintu shashiweza kulikwepa livuki lyakuyi.

7 Lagiru ya Mtuwa Mlungu ndo ikamilika,

impanana muntu ukomu wasyayi,

malagaliru ga Mtuwa Mlungu ga gagalambukandiri,

gawapanana luhala yawawerandiri na umani.

8 Malagaliru ga Mtuwa Mlungu ndo za haki,

inemiziya miyoyu,

lagiru lya Mtuwa Mlungu ijega ulangala,

itenda masu gawoni.

9 Kumguwira Mtuwa Mlungu ndo mlandu mnanagala,

nagwa mashaka goseri,

malagalira ga Mtuwa Mlungu ndo maheri,

nageni ndo ga haki.

10 Ya mana kuliku zahabu,

kuliku zahabu iherepa nentu,

inoga kuliku lwashi na

kuliku lisega liherepa.

11 Aga ganfunda neni ntumintumi gwaku,

kugafata aga kunjegera lifupu likulu.

12 Kumbiti gaa yakawona makosa gakuyi mweni?

Gwee Mtuwa Mlungu, gundekisiliri makosa yanagamanandiri.

13 Gushingi neni ntumintumi gwaku nantenda makosa ga ng'anji,

nagujimira aga gankolimlima.

Su nawera na lalama,

pota kuwera na likosa likulu.

14 Visoweru vya mlomu gwangu,

na maholu ga moyu gwangu gajimiliki kulongolu kwaku,

gwee Mtuwa Mlungu, litalabuhi lyangu na mkombola gwangu!