1 Hanongi mayagashii kwa Mtuwa Mlungu vyaka vyoseri,

hapeni ndeki nakamu kuzikanta zyuma zakuyi.

2 Neni hanilitumbi kwajili ya Mtuwa Mlungu,

wanyongi wapikiniri na kunemelera.

3 Mmukwisi Mtuwa Mlungu pamuhera na neni,

twawoseri pamuhera tulizyumi litawu lyakuyi.

4 Nimluwiti Mtuwa Mlungu na yomberi kanankula

na kumpusiya mulyoga lyangu lyoseri.

5 Yawamtumbira Mlungu wanemeleri;

namwenga hapeni msoniziwi nakamu.

6 Mhushu kamliliti Mtuwa Mlungu na yomberi kampakinira

na kamlopola muntabika zakuyi zoseri.

7 Malaika gwa Mtuwa Mlungu kawalolera woseri yawamguwira

na kuwalopola muhatali.

8 Mjeri muwoni Mtuwa Mlungu ntambu yakawera mheri,

mbaka muntu yakatugira uponera kwayomberi,

9 Mmuguwiri Mtuwa Mlungu mwenga wananagala wakuyi,

toziya yawamguwira hapeni wapungukiwi shintu.

10 Ata wana wa simba wapungukiwa na kuwona njala,

kumbiti yawamsakula Mtuwa Mlungu hapeniwakosi shintu shiheri

11 Wanawaneni mwizi, mpikiniri,

neni haniwafundi kumguwira Mtuwa Mlungu.

12 Hashi, gufira kunemelera makaliru?

Nakulikala makaliru matangala na kunelelera maheri?

13 Su, guleki kulonga madoda,

na guleki kulonga mpayu.

14 Guleki ukontola, gutendi maheri,

gusakuli ponga na kuyitenda.

15 Mtuwa Mlungu kawalolaga yawatenda maheri

nakupikinira kulira kwawu,

16 kumbiti kawasinga wantu yawatenda makontola,

pawahowaku vumu walyaluwika nakamu.

17 Yawatenda maheri pawamlilira Mtuwa Mlungu yomberi kawapikanira,

na kuwalopola muntabika zawu zoseri.

18 Mtuwa Mlungu kapakwegera na yawatwezuka moyu,

nakuwalopola wantu wa yawahera litumbiru.

19 Ntabiku za muntu mheri ndo zivuwa,

kumbiti Mtuwa Mlungu kamlopola kulawa muntabiku zoseri azi.

20 Mtuwa Mlungu kavilolera viwungu vya nshimba yakuyi yoseri,

kwahera ata luhonju lwakuyi lumu halumegeki.

21 Udoda uwajegera wakontola kuhowa,

yawawakalalira yawatenda maheri hawakomangwi.

22 Mtuwa Mlungu kalopola makaliru ga wantumintumi wakuyi,

woseri yawamtugira hapeni wakomangwi.