1 Gwee Mlungu ngangamala kumoyu,

hanimbi na kukufyapilira!

Gwimuka, gwee moyu gwangu!

2 Mwimuki mwee lingutinguti na lugombugombu!

Hanikwimusiyi mandawira putiputi.

3 Gwee Mtuwa Mlungu,

hanongi mayagashii pakati pa wantu,

hanikuzyumi pakati pa maisi gamonga.

4 Mana ufiru waku ndo mkulu kuliku mpindi,

uwaminika waku usoka mpaka kumawundi.

5 Gwee Mlungu gukwiswi kumpindi!

Uweru waku uweri pasipanu poseri!

6 Wantu awa yaguwafira na waponiziwi,

guwatangi kwa liwoku lyaku na gutwankuli.

7 Mlungu katakula kulawa pananagala pakuyi,

"Pawera mkanka haniyibaguli Shekemu,

na lulalanda lwa Sukoti hanilupimi vipandi vipandi.

8 Gileadi ndo yaneni na Manasi ndo yaneni,

Efraimu ndo kofia yaneni ya shuma,

na Yuda ndo luhonga lyaneni lya ukolamlima.

9 Isi ya Moabu ndo handa bakuli yaneni ya kunawira,

shilwatu shaneni hanishasili isi ya Edomu kuyikolamlima.

Hambotangili ukanka mu isi ya Filisti!"

10 Gaa yakafira kunjega kumji yagwana liboma?

Gaa yakaweza kunongoziya mpaka muisi ya Edomu?

11 Gwee Mlungu, gutuleka nakamu?

Hashi gugendandiri na wamashonta wetu?

12 Gututangi tuwakanki wankondu wetu,

toziya utanga wa wantu ufaandiri shintu.

13 Mlungu pakawera uwega watwenga hatukanki,

yomberi hakawaposholi wankondu wetu.