1 Naguyerayera toziya ya ukontola,

naguwawonera weya yawatenda madoda.

2 Toziya awa hawawuki katepu handa lyasi,

hawanyali kalongola handa vimeru viwisi,

3 Gumtumbiri Mtuwa Mlungu na kutenda maheri,

gupati kulikala muisi na kuwera poneka.

4 Guisakuli nemeru yaku kwa Mtuwa Mlungu na

yomberi hakakupanani gagufira mumoyu mwaku.

5 Gumpanani Mtuwa Mlungu makaliru gaku,

gumtumbiri yomberi na yomberi hakakutangi.

6 Hakawutendi uheri waku ung'ering'eti,

na haki yaku ilangali handa mshenji gwa paluwala.

7 Gukalijii kulongolu kwa Mtuwa Mlungu, gumhepi kwa hepelera,

naguyerayera toziya ya walii yawana mpatiru,

wantu yawafanikiwa mumipangu yawu midoda.

8 Gushapili maya pota naguwera na nkalala,

toziya aga gongera udoda.

9 Wantu yawatenda madoda hawalaguwi,

ila yawamtumbira Mtuwa Mlungu hawahali isi.

10 Isigala padidini hera, mkontola hapakaweri,

hagumsakuli palii pakaweriti, pota hapeni gumwoni.

11 Kumbiti wananaga hawayihali isi,

na hawanemeleri uvuwa wa ponga.

12 Mkontola katenda mpangu gwa kumtenda muntu mheri,

na kumgayagayira menu kwa nkalaliru;

13 kumbiti Mtuwa Mlungu kamseka mkontola,

toziya kavimana upeleru wakuyi wapakwegera.

14 Wakontola wasomola ligumba na kunika pindi zawu,

wapati kuwalaga wahushu na yawahera shintu,

wawalikituli wantu yawalikala kwa kumfiriziya Mlungu,

15 kumbiti magumba gawu hagawalagi weni,

na pindi zyawu hazimegangwimegangwi.

16 Mbaka muntu mheri yakana lunda ndidini,

kuliku wantu wakontola yawana lunda zivuwa,

17 toziya makakala ga wakontola hagamegwi,

kumbiti Mtuwa Mlungu kawatanga wantu waheri.

18 Mtuwa Mlungu katulaweri makaliru ga wantu waheri,

na uhala wawu hawulikali mashaka goseri.

19 Hapeniwatabiki pavisoka vyaka vidoda,

mashaka ga njala hawaweli na shiboga shivuwa.

20 Kumbiti wakontola hawagamiri,

wankondu wa Mtuwa Mlungu hawanyali handa uluwa kuntuntu,

yina hawawuki handa lyosi.

21 Muntu mkontola katola uwanda pota kuwuziya,

kumbiti muntu mheri kalaviya kwa kukalamuka.

22 Yawatekeleritwi na Mtuwa Mlungu hawahali isi,

kumbiti yawapangilitwi na yomberi hawalagwi.

23 Mtuwa Mlungu kazilongoziya njira za muntu,

kalolera maleka ga yakamfiriziya,

24 ata pakalikwala hapakaguwi,

toziya Mtuwa Mlungu kamtanga.

25 Weriti mntemba vinu ndo mzewi,

nakaka haneniwoni muntu mheri kalekwa na Mlungu,

ama wana wakuyi pawaluwaluwa shiboga.

26 Mashaka goseri kawapanana wamonga kwa nemeru na kulaviya uwanda,

na wana wawu hawatekelerwi.

27 Guleki ukontola, gutendi maheli,

nagwenga hagulikali mashaka goseri,

28 mana Mtuwa Mlungu kafira haki,

pota hapakawaleki waaminika wakuyi.

Kawalolera awa mashaka goseri,

kumbiti wiwuka wa wakontola hawagamiziwi.

29 Yawamfiriziya Mlungu hawayihali isi,

na hawalikali amu mashaka goseri.

30 Mlomu gwa muheri gulonga visoweru vya luhala,

kwa lulimi lwakuyi kalonga visoweru vya haki.

31 Lagiru ya Mlungu gwawu yamumoyu mwawu,

na womberi wahera lyoga mmatendu gawu.

32 Muntu mkontola kamgwadira muntu mheri

nakujera kumlaga,

33 kumbiti Mlungu kamlekandiri mumawoku mwa mnkondu,

pota kamlekandiri katozwi pawamshitaki.

34 Gumtumbiri Mtuwa Mlungu na kukolanjira yakuyi,

na yomberi hakakutendi guyihali isi,

na kuwawona wakontola pawagamiziwa.

35 Nimwoniti mkontola mnkesera nentu,

kalitula pampindi pa woseri handa mitera ya mielezi ya Lebanoni,

36 shakapanu mpititi panu, nayomberi kaweritikayindiri,

nimsakula kumbiti kawonekakayindiri.

37 Gumloli muntu mheri, muntu mwaminika,

muntu yakafira ponga kapananwa wiwuka,

38 kumbiti watenda vidoda woseri hawagamiziwi,

na wiwuka wawu hawulagwi.

39 Mtuwa Mlungu kawalopola wantu waheri,

na kuwalolera shaka sha ntabiku.

40 Mtuwa Mlungu kawatanga na kuwalopola,

kawalaviya mumawoku mwa wakontola na kuwalopola,

mana watugira uponera kwakuyi.