1 Gumzyumi Mtuwa Mlungu!

Gwee rohu yangu gumzyumi Mtuwa Mlungu!

2 Hanimzyumi Mtuwa Mlungu makaliru gangu goseri,

Hanimwimbiri Mlungu gwangu mashaka gangu goseri.

3 Namuwatumbira wakulu wa isi,

awa ndo wantu hera, wawezandiri kulopola.

4 Muntu pakahowa kawuya mumadikudiku,

lishaka lilaali mipangu yakuyi yoseri ipera.

5 Katekelerwa muntu yakatagwa na Mlungu gwa Yakobu,

muntu yakatuliti litumbiru lyakuyi kwa Mtuwa Mlungu, Mlungu gwakuyi,

6 Yakawumbiti mpindi na pasipanu,

bahari na vyoseri yaviwera amu.

Mashaka goseri yomberi ndo mwaminika.

7 Yomberi kawateteya yawaonerwa,

kawapanana wana njala shiboga.

Mtuwa Mlungu kawavugula yawatatirwa,

8 Kawatenda yawanalwisi wawoni.

Mtuwa Mlungu kawanyasula yawaguwa,

kawafira wantu yawawera waminika.

9 Mtuwa Mlungu kawalolera wahenga,

kawatanga wakenja na yawahera tati,

kumbiti kazivuluvutira njira ya wakontola.

10 Mtuwa Mlungu hakakolimlima mashaka goseri,

gwee Sayuni, Mlungu gwaku ndo mfalumi gwa viyiwuku woseri!

Mmuzyumi Mtuwa Mlungu!