1 Gwee Mtuwa Mlungu paguwera na maya nagungalapira,

pota kungomanga kwa ngalaliru yaku.

2 Mana misali yaku insoma,

liwoku lyaku lintenda.

3 Kwahera pahala pa mbaka mnshimba yangu,

toziya gunkalalira, ndwala nshimba yoseri mpaka mumihonjhu, toziya ya vidoda vyangu.

4 Vidoda vyangu vivuwa ng'anji,

vintopera gambira shishanka shizotopa nentu kwa neni.

5 Vironda vyangu viwola na kununka,

na aga ndo malawiru ga uzigizigi wangu.

6 Ng'ong'onara na kunanaga,

paluwala poseri pazyengeta na kudaya.

7 Mgongu gwangu gulwala,

Nshimba yaneni yoseri ilwala.

8 Nonda na ndeweleka,

hinginika na kushenyiwa mumoyu.

9 Gwee Mtuwa Mlungu, gwenga guvimana ntambu yanikutumbila,

kulira kwangu kulififandiri kwaku.

10 Moyu gwangu gundunda kalongola, makakala gampelera,

ata masu gangu gawonandiri weri.

11 Waganja wangu washapila toziya ya ntabika yangu,

nakaya yangu wakala kutali naneni.

12 Yawafira kundaga wanyambira migomiziwu yawu,

yawanfilira ntenduwi wantishiya kundaga.

Paluwala poseri watenda mipangu toziya ya neni.

13 Kumbiti neni wera handa muntu yakapikinirandiri,

wera handa yakawezandiri kutakula shintu.

14 Yina, wera handa muntu yakapikinirandiri,

handa muntu yakawezandiri kuliteteteya.

15 Kumbiti neni nikutumbira gwee Mtuwa Mlungu,

gwee Mtuwa Mlungu, Mtuwa gwangu, gwenga ndo hagunankuli.

16 Nikuluwa wankondu nawanonganga,

nawalizyuma kuguwa kwa neni.

17 Napakwegera kuguwa,

nanautama mashaka goseri.

18 Nduwa kulekeziwa vidoda,

mana vidoda vyangu vihinginiziya.

19 Wankondu yawankalalira pota toziya ndo wavuwa,

yawanfirandiri wawalangikandiri.

20 Awa yawandipa makontola kwa maheri ganiwatendiriti,

wanema toziya ntenda maheri.

21 Gwee Mtuwa Mlungu, Mlungu gwangu, nagunasa,

naguwera kutali naneni.

22 Gwee Mtuwa Mlungu, gwizi kalongola guntangi,

gwenga yaguwera ulopola wangu.