1 Nimfira Mtuwa Mlungu,

toziya kampikinira,

kapikinira shaka pandira kuluwa utanga.

2 Yomberi kampikanira,

hangu hanimluwi shaka shoseri sha makaliru gangu.

3 Atali ya kuhowa izyengetiti,

vitiliziwu vya lisembi vinkankaliti,

niwiti na magaziwu na kwinginika.

4 Shakapanu nimlilira Mtuwa Mlungu,

"Gwee Mtuwa Mlungu, shondi gundopoli!"

5 Mtuwa Mlungu ndo muheri na kana haki,

Mlungu gwetu kana lusungu.

6 Mtuwa Mlungu kawalolera wahushu,

pamonilitwi kandopola.

7 Gwee moyu gwangu guwuyi pahala paku,

toziya Mtuwa Mlungu kakutendera maheri.

8 Gundopola mkuhowa

gumpukuta masozi gangu,

gundolera naniza kulikwala,

9 hang'endi kulongolu kwa Mtuwa Mlungu,

muisi ya wantu yawawera wakomu.

10 Weriti na njimiru mpaka panongiti,

"Neni ntabisiwa nentu."

11 Paweriti na lyoga nongiti,

"Wantu woseri wapaya!"

12 Nimwuzilili shishi Mtuwa Mlungu,

kwa uheri wakuyi woseri wakantenderiti?

13 Hanimlavilili shikombi sha divayi kuwera tambiku,

na kumgambira mayagashii Mtuwa Mlungu kwa kundopola.

14 Hanimtendeli Mtuwa Mlungu nazili zangu,

kulongolu kwa wantu wakuyi woseri.

15 Kuhowa kwa wamwamini kuna mana pamasu ga Mtuwa Mlungu.

16 Gwee Mtuwa Mlungu neni na ntumintumi gwaku,

neni na ntumintumi gwaku mwana gwa ntumintumi gwaku mdala,

gundopola kulawa muvitawaliru vyangu.

17 Hanikulaviliri tambiku za kulonga mayagashii,

na kulishemira litawu lya Mtuwa Mlungu.

18 Hantendi shantakuliti kwa Mtuwa Mlungu,

kulongolu kwa wantu waku woseri,

19 kuligeleri lya numba ya Mtuwa Mlungu,

pakati pa Yerusalemu.

Mmuzyumi Mtuwa Mlungu!