1 Watekelerwa wantu yawalikala pota likosa,
yawafata lagiru lya Mtuwa Mlungu.
2 Watekelerwa yawafata malagaliru gakuyi,
yawamsakula kwa moyu gwawu goseri,
3 wantu yawatendandiri ukontola nakamu,
ila mashaka goseri wankufata njira zaku.
4 Gwee Mlungu, gutupanana lagiru zyaku
su tuzikoli kwa waminika.
5 Kumbiti mgenderanu gwangu megugangamali,
kwa kugafata malagalira gaku!
6 Panizikola lagiru zaku zoseri,
nakaka hapeni nsoniziwi.
7 Hanikuzyumi kwa moyu guherepa,
panilifunda malagaliru gaku ga haki.
8 Hanigafati malagalira gaku,
nagundeka nakamu.
9 Ntambu gaa mntemba kayitendi njira yakuyi iweri iherepa?
Ndo kwakulikala teratera na shisoweru shaku.
10 Hanikusakuli kwa moyu gwangu goseri,
nagundeka nigaleki malagalira gaku.
11 Mumoyu mwangu nishitula shisoweru shangu,
naniza kukutendera vidoda.
12 Gutekelerwi, gwee Mtuwa Mlungu!
Gunfundi malagalira gaku.
13 Hambuyili kayi kwa liziwu
malagira gaku goseri gagulaviyiti.
14 Hanemeleri kufata malagaliru gaku,
handa muntu yakanemelera lunda ivuwa.
15 Nigahola malagalira gaku,
na kulola njira zaku.
16 Niganemelera malagalira gaku,
hapeni nilyaluwi shisoweru shaku,
17 Guntenderi neni ntumintumi gwaku kwa uheri,
mpati kulikala na kujimira shisoweru shaku.
18 Guvuguli masu gangu,
su nigawoni makangashu ga lagiru yaku.
19 Neni namhenga hera pasipanu;
nagunfifa lagiru zaku.
20 Rohu yaneni ilwala kwa nfiru nkulu
ya kuvimana lagiru zaku mashaka goseri.
21 Gwenga guwakalipira wana mtiti,
yawapangilitwi weni yawazimirandiri lagalira zaku.
22 Gunshapili na mayigiranga na mabeziwu,
toziya nigafata malagalira gaku.
23 Tembera wakulu wapanga kuntendera madoda,
neni ntumintumi gwaku hanigaholi malagalira gaku.
24 Malagalira gaku ndo nemeru yaneni,
geni ndo matakuziya gangu.
25 Ng'alangata pasi mumadiku,
gunupi kayi ukomu ntambu yagutakuliti.
26 Nikugambira njira zangu, nagwenga gunankula,
gunfundi malagalira gaku.
27 Gunfundi ntambu ya kukola njira zakuyi,
naneni hanigaholi matendu gaku ga makangashu.
28 Ntoka kulira kwa hinginika,
gumpuziliri likakala ntambu yagulongiti.
29 Gunshapili na njira zya upotiziya,
gunfundi kwa uheri lagiru yaku.
30 Nsyagula njira ya waminika,
moyu gwangu gufata malagalira gaku.
31 Gwee Mtuwa Mlungu, nfata malagalira gaku,
nagujimira nsoniziwi!
32 Hanjimiri malagalira gaku,
toziya gumpanana umani nentu.
33 Gwee Mtuwa Mlungu, gunfundi kujimira malagalira gaku,
naneni hanigakoli mpaka upeleru.
34 Gumaniziyi naneni hanfati lagiru yaku,
hanfati kwa moyu gwangu goseri.
35 Gunongoziyi munjira ya lagiru zaku,
mana amu mpata nemeleru.
36 Gumpanani nfiru ya kufata malagira gaku,
kuliku kupata ulunda.
37 Gugalambuli masu gangu nagalola mirandu yayahera mana,
gunanguzuyi njira yaku, gunupi ukomu.
38 Guntenderi shagulongiti kwa neni ntumintumi gwaku,
shilii shashiwatenda wantu wakupanani ligoya.
39 Gundopoli na soni yantira,
mana malagalira gaku ndo maheri.
40 Guloli ntambu ya nfira nentu lagiru zaku,
gumpanani ukomu wa syayi toziya gwenga ndo mwaminika.
41 Gwee Mtuwa Mlungu, ufiru waku yawahera upeleru unizili,
gundopoli kulawirana na shisoweru shaku.
42 Panu hawezi kuwawankula awa yawanigira,
toziya neni namini nentu shisoweru shaku.
43 Gumpanana kutakula nakaka mashaka goseri,
toziya litumbiru lyangu lya mulagiru yaku.
44 Hanjimili lagiru yaku kila shaka,
haniyikoli mashaka goseri.
45 Hantyangi pawera lekeru,
toziya njimira lagiru zyaku.
46 Haniwabweleri wafalumi lagiru zaku,
na hapeni nsoniziwi,
47 Nemeru ya neni ndo kuzijimira lagalira zaku,
zyeni neni nizifira.
48 Nizipanana ligoya na kuzifira lagiru zaku,
hanigaholeri malagalira gaku.
49 Guholi shagulongiti kwa neni ntumintumi gwaku,
shagulongiti sheni shimpanana litumbiru.
50 Pawera mkutabika ashi shinyamaziya,
toziya shagutakuliti shimpanana ukomu.
51 Yawanamtiti wambeza nentu,
kumbiti neni ndekandiri lagiru yaku.
52 Panigahola malagalira gaku ga makashu,
gwe Mtuwa Mlungu ganzyanganzyanga.
53 Nana maya gakalipa kwajili ya wakontola,
weni yawaleka lagiru yaku.
54 Malagalira gaku gawera lwimbu lwaneni,
poseri pang'enda.
55 Gwee Mtuwa Mlungu, pashiru nilihola litawu lyaku
na kukola lagiru yaku.
56 Ayi ndo tekelera nkulu kwa neni,
toziya nigajimira malagalira gaku.
57 Gwee Mtuwa Mlungu, ndo uhala wangu,
nonga hanjimiri malagaliru gaku.
58 Nfira kukufiriziya kwa moyu gwangu goseri,
gumoneri lusungu ntambu yagulongiti.
59 Niliholera njira zangu,
na mbuya nfati malagalira gaku.
60 Ntenda kalongola pota kukawalira
kufata lagiru zaku.
61 Ata wakontola pawanyambira migomiziwu,
kumbiti neni hapeninilyaluwi lagira zaku.
62 Pashiru totolu nimka kulonga mayagashii,
toziya ya malagalira gaku ga haki.
63 Neni ndo ganja gwa woseri yawakujimira,
ganja gwawu yawafata magambiziwu gaku.
64 Gwee Mtuwa Mlungu pasipanu pamema ufiru waku,
gunfundi malagaliru gaku.
65 Guntenderi maheri neni ntumintumi gwaku,
ntambu yagulongiti, gwee Mtuwa Mlungu.
66 Gunfundi kuwera na umani, nakwamuwa weri
toziya namini lagaliru zaku.
67 Pamberi pa kunkomanga weriti pankoseya,
kumbiti vinu nkola shisoweru shaku.
68 Gwenga ndo mheri na gutenda maheri,
gunfundi malagalira gaku.
69 Wana mtiti walonga mpayu toziya yangu,
kumbiti neni hankoli lagalira zaku kwa moyu goseri.
70 Miyoyu yawu minkesera na ikamala,
kumbiti neni nemelera lagiru yaku.
71 Iheripiti kwa neni kupata ntabiku,
su nilifundi lagiru yaku.
72 Lagiru yayilawa kwagwenga ndo ya samani nentu kwaneni,
kuliku lunda zoseri za pasipanu.
73 Gwenga ndo yagumumbiti kwa mawoku gaku na guntenda ntambuyawera
gumpanani mahala su nilifundi lagaru zaku.
74 Yawakuguwira hawamoni na kunemelera,
toziya litumbiru lyaneni lya mushisoweru shaku.
75 Nivimana toza zaku ndo za kwaminika gwee Mtuwa Mlungu,
na kwa uwaminika waku, gunkomanga.
76 Ufiru waku uzyangizyangi,
ntambu yagung'ambiliti neni ntumintumi gwaku.
77 Gumoneri lusungu su nilikali,
toziya lagiru yaku ndo nemelera yaneni.
78 Yawanamtiti wasoniziwi toziya wampayira,
kumbiti neni hanigaholi malagaliru gaku.
79 Woseri yawakuguwira wizi kwaneni,
wapati kuvimana lagalira zaku.
80 Moyu gwangu naguwera na likosa mu lagaliru yaku,
su nasoniziwa.
81 Ntoka kuhepelera ulopola waku,
ntula litumbiru lyangu mushisoweru shaku.
82 Masu gangu gatoka kuhepelera shagutakuliti.
Ngosiya, "Hagwizi ndiri kunzyangazyanga?"
83 Nkukutala handa likuli lyaliyumiziwa mulyosi,
ata hangu haneni lilyaluwi lagalira zaku.
84 Neni ntumintumi gwaku hahepeleri mpakandii?
Haguwakomangi ndii walii yawantabisiya?
85 Wana mtiti wambawira malindi,
lyeni lagiru lyakundiri.
86 Lagiru zaku zoseri ndo za kwaminika,
guntangi toziya wantu wantabisiya pota likosa!
87 Wapakwegera kunagamiziya,
kumbiti neni ndekandiri lagiru zaku.
88 Gumponiziyi teratera na ufiru waku,
su nfati malagaliru gagulongiti.
89 Gwee Mtuwa Mlungu shisoweru shaku,
shilikala mashaka goseri,
shigangamla kumpindi.
90 Waminika waku ulikala viyiwuku vyoseri,
gupawumba pasipanu napeni palikala.
91 Lagiru zyaku zilikala mpaka leru,
toziya vintu vyoseri vikutendera.
92 Handa menemelerindiri lagiru yaku,
Menagamiri muntabiku zyangu.
93 Hapeni nigalyaluwi nakamu malagiru gaku,
mana kwa aga gumpanana ukomu.
94 Neni na gwaku, gundopoli,
toziya nkamala kuzijimira lagira zaku.
95 Wakontola wangwadira wapati kundaga.
Kumbiti neni nigaholera malagira gaku.
96 Nivimana kuwera kila shintu shashikamilikiti shana upeleru,
kumbiti lagaru zaku zahera mpaka.
97 Niifira nentu lagiru yaku!
Niyihola paliwala poseri!
98 Lagiru yaku impanana luhala nentu kuliku wankondu waneni,
toziya ya pamuhera naneni kila shaka.
99 Nana mahala kuliku wafunda waneni woseri,
toziya nigahola malagalira gaku.
100 Nana umani kuliku wazewi,
toziya nizikola lagaliru zaku.
101 Nililewelera nanfata njira idoda,
su wezi kujimira shisoweru shaku.
102 Nizilekandiri lagiru zaku,
toziya gamweni gwenga gunfunditi.
103 Visoweru vyaku vinoga nentu kwaneni,
vinoga kuliku lwashi!
104 Kwa lagira zaku mpata luhala,
hangu nkalalira kila njira idoda.
105 Shisoweru shaku ndo shikoloboyi sha kulonguziya magulu gangu,
na kulangala munjira ya neni.
106 Nilirapa na kutenda shilii shantakuliti,
kuzitenda lagiru zyaku zya haki.
107 Gwee Mtuwa Mlungu, ntabika nentu,
gugangamaziyi makaliru gangu kulinganira na shisoweru shaku.
108 Gwee Mtuwa Mlungu, gwanki zyuma za kulilaviya namweni,
na gunfundi malagalira gaku.
109 Makaliru gangu gamkutenduwa mashaka goseri,
kumbiti hapeni nilyaluwi lagiru yaku.
110 Wakontola wanyambira mgomiziwu,
kumbiti ngalambukandiri malagaliru gaku.
111 Lagiru zaku ndo uhala waneni mashaka goseri,
geni ndo nemeleru ya moyu gwangu.
112 Nfira kwa moyu gwangu goseri
kugafata malagalira gaku mashaka goseri.
113 Niwakalalira wantu wafyanku,
kumbiti niyifira lagiru lyaku.
114 Gwenga ndo lusegeyu lwangu, kwa gwenga mpata uponera,
ntula litumbiru mu shisoweru shaku.
115 Muwuki kwaneni mwenga yamtenda madoda,
su wezi kukola lagalira za Mlungu gwangu.
116 Gungangamaziyi ntambu yagulongiti naneni hanilikali,
naguleka litumbiru lyangu lyagamiri.
117 Guntangi naneni haweli poneka,
mashaka goseri su nilikali panjimira lagiru zaku.
118 Guwalema woseri yawagalambuka malagalira gaku;
toziya uzyanga wawu ndo hera.
119 Wakontola woseri guwawona handa uhakata,
hangu nilifira lagalira lyaku.
120 Nendemera kwa kukutira gwenga,
nina lyoga toziya ya lagiru zaku.
121 Ntenda mirandu miheri na iherepa,
nagundeka kwa wankondu wangu.
122 Gung'ambiri handa haweri poneka,
naguwaleka yawana mtiti wamoneri.
123 Masu gatifutifu kuhepelera shagutakuliti
pahepelera shisoweru shaku sha nakaka.
124 Guntenderi neni ntumintumi gwaku kulinganira na ufiru waku,
gunfundi malagalira gaku.
125 Neni ndo ntumintumi gwaku, gunupi umani,
su wezi kuvimana lagiru zaku.
126 Gwee Mtuwa Mlungu, vinu ndo shaka sha kutenda shintu,
toziya wantu wayimega lagiru laku.
127 Toziya nizifira lagiru zaku kuliku zahabu,
yina kuliku zahabu iherepa.
128 Hangu, nfata lagiru zaku zoseri,
kila njira yayipotuziya niyikalalira.
129 Lagiru zaku ndo za kulikangasha,
hangu nizijimira.
130 Kutakulira visoweru vyaku vijega kulangala,
kuwapanana mahala wantu yawamanandiri.
131 Nasama mlomu kwa hamu nkulu,
toziya nfiriti.
132 Gungalambukili na kumonera lusungu,
ntambu yaguwatenda yawakufira.
133 Gulongoziyi maleka ganeni kwa shisoweru shaku,
nagundeka nkolwimlima na ukontola.
134 Gundopoli na wantu yawamonera,
su wezi kuzijimira lagiru zaku.
135 Gundoli kwa lusungu neni ntumintumi gwaku,
na gunfundi lagiru zaku.
136 Masu gangu galawa masozi gavuwa handa lushemba,
toziya ya wantu yawajimirandiri lagiru yaku.
137 Gwee Mtuwa Mlungu, gwenga ndo yagwana haki,
na toza zaku ndo zanakaka.
138 Lagiru zaku ndo za haki,
na uwaminika.
139 Ugangamala wangu unagamiziya,
mana wankondu waneni walisherandiri visoweru vyaku.
140 Shagulongiti ndo nakaka,
naneni ntumintumi gwaku nishifira.
141 Tembera neni na mdidini na mbeziwa,
kumbiti nilyaluwandiri lagiru zaku.
142 Haki yaku ndo ya mashaka goseri,
lagiru yaku ndo ya nakaka.
143 Ntabiku na hinginika vimbata,
kumbiti lagiru zaku ndo nemeleru yaneni.
144 Lagiru zaku ndo za haki mashaka goseri,
gumpanani umani su wezi kulikala.
145 Nikulilira Kwa moyu gwangu goseri,
gwee Mtuwa Mlungu, gunankuli su nfati lagiru zaku.
146 Nikulilira, gundopoli,
mpati kugatenda malagalira gaku
147 Nimuka mandawira putiputi na kukuluwa guntangi,
ntula litumbiru lyangu mushisoweru shaku.
148 Ngonjandiri pashiru poseri,
Su niliholi shisoweru shaku.
149 Gwee Mtuwa Mlungu, kwaufiru waku gumpikiniri,
gutuliweri makaliru gangu kulinganira na lagiru zaku.
150 Walii yawapanga makontola wapakwegera naneni,
kumbiti wakutali na lagiru yaku.
151 Kumbiti gwee Mtuwa Mlungu gwapakwegera,
na lagiru zaku zoseri za nakaka.
152 Kwanjira makashu, nilifunda malagaliru gaku,
geni gugatula ata galikali mashaka goseri.
153 Guloli ntabika yaneni, gundopoli,
toziya nilyaluwandiri lagiru yaku.
154 Gundeteyi na kunkombola,
gumpanani ukomu kulinganira na shisoweru shaku.
155 Ulopola waku wakutali na wakontola,
toziya walisherandiri lagiru zaku.
156 Gwee Mtuwa Mlungu, lusungu lwaku ndo lukulu,
gumpanani ukomu ntambu yagulongiti.
157 Wankondu na wankesera waneni ndo wavuwa,
kumbiti neni hapandeki lagiru laku.
158 Paniwawona yawaminindiri nkalala,
toziya wazijimirandiri malagalira gaku.
159 Gwee Mlungu, guloli ntambu yanfira malagaliru gaku!
Gumpanani ukomu teratera na ufiru waku.
160 Visoweru vyaku vyoseri ndo nakaka,
lagiru zaku za haki na zilikali mashaka goseri.
161 Wakolamlima wankuntabisiya pota likosa,
kumbiti moyu gwangu guwera na ligoya kwa visoweru vyaku.
162 Nemelera toziya ya shisoweru shaku,
handa muntu yakapatiti shintu sha mana nentu.
163 Nkalalira na nfirandiri mpayu nakamu,
kumbiti nilifira lagiru lyaku.
164 Kila lishaka neni nikuzyuma mala saba,
toziya ya lagiru zyaku ndo za haki.
165 Yawafira lagiru yaku wanaponga nentu,
pota kwahera yashiweza kuwagusiya.
166 Gwee Mtuwa Mlungu, nikuhepera gundopoli,
neni njimira lagalira zaku.
167 Nigajimira magambiziya gaku,
toziya nigafira nentu.
168 Nizijimira lagiru zaku na malagalira gaku,
toziya gwenga guziwona njira zangu.
169 Gwee Mtuwa Mlungu, kulira kwa kuluwa utanga kwaneni kukufikiri!
Gumpanani umani kulinganira na shisoweru shaku.
170 Luwa yaneni ikufikiri,
gundopoli kulinganira na shisoweru shaku.
171 Hanikuzyumi mashaka goseri,
toziya gunfunda malagalira gaku.
172 Hanimbi lagiru zaku,
toziya lagiru zaku zoseri ndo za haki.
173 Liwoku lyaku liweri kala kuntanga,
mana namuwa kufata lagiru zaku.
174 Gwee Mtuwa Mlungu nfira gundopoli,
lagiru lyaku ndo nemeleru yaneni.
175 Gundeki nilikali su nikuzyumi,
na lagiru zaku zintangi.
176 Nyerayera handa kondolu yakagamiliti,
gwizi gunsakuli neni ntumintumi gwaku,
toziya nilyaluwandiri lagiru zaku.
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)