1 Mtuwa Mlungu ndo langala yaneni na ulopola wangu,

nimtiri gaa?

Mtuwa Mlungu ndo liboma lya ukomu wangu,

hapeni nimtiri muntu yoseri.

2 Wakontola pawankomanga na kufira kundaga,

wasinganu na wankondu waneni hawalikwali na kuguwa.

3 Ata lishonta palizyengeta,

moyu gwangu hapeni gutiri shintu,

ata pawera na nkondu,

badu nimtumbira Mtuwa.

4 Mlandu gumu nimluwa Mtuwa Mlungu,

na gweni ndo yanigusakula,

nilikala mnumba mwa Mtuwa Mlungu mashaka goseri ga kulikala kwangu,

niwuwoni uherepa wakuyi Mtuwa Mlungu na

kusakula malonguziwu gakuyi Muhekalu lyakuyi.

5 Lishaka lya ntabiku hakanfifi munumba mwakuyi,

hakanfifi muliringu lyakuyi,

na hakantuli poneka pa litalambuhi.

6 Naneni haniwakanki wankondu wangu yawazyengeta.

Hanimlaviliri tambiku kwa nemeleru Mulihekalu lyakuyi,

hanimbi na kumnemelera Mtuwa Mlungu.

7 Gwee Mtuwa Mlungu gupikinili, panukulilira,

gumoneri lusungu na gunankula.

8 Moyu gwangu gung'ambira,

gwizi gumsakuli Mtuwa Mlungu,

su niza kwa gwenga, gwee Mtuwa Mlungu.

9 Nagushififa sheni shaku,

Nagunkalalira na kunema neni ntumintumi gwaku,

gwenga guwera mtanga gwangu mashaka goseri;

nagunasa pota kundeka,

gwee Mlungu mlopola gwangu.

10 Ata walela waneni pawanasa,

Mtuwa Mlungu hakananki kwakuyi.

11 Gunfundi njira yaku,

gwee Mtuwa Mlungu, gunonguziyi munjira yayiwera teratera,

toziya ya wankondu waneni.

12 Nagundeka wankondu wantendi ntambu yawafira,

toziya wakapitawu wa upayu wafira wantendi,

na womberi walaviya matiriziwu ga unkesera.

13 Nivimana kuwera haniwuwoni uheri wakuyi

Mtuwa Mlungu muisi yawalikala wantu wakomu.

14 Gumtumbiri Mtuwa Mlungu.

Guweri na moyu, naguwuya kumbeli.

Yina gumtumbiri Mtuwa Mlungu.