1 Gwee Mtuwa Mlungu, gumpikiniri na gunankuli,

toziya neni ndo mhushu nahera shintu.

2 Gugaloleri makaliru gangu mana neni namwaminika kwagwenga,

gundopoli neni ntumintumi gwaku yanikutumbira.

3 Gwenga ndo Mlungu gwangu,

su, gumoneri lusungu,

toziya nikuliliri paluwala poseri.

4 Guyinemiziyi rohu ya neni ntumintumi gwaku,

mana maluwa gangu nikujegara gwee Mtuwa.

5 Gwee Mtuwa, gwamheri na yagulekiziya,

ufiru waku ndo uvuwa kwa woseri yawakuluwa.

6 Gwee Mtuwa Mlungu, gupikanili kuluwa kwangu,

gupikanili kulira kwangu.

7 Mashaka ga kutabika hanikushemi,

toziya gwenga hagunankuli.

8 Gwee Mtuwa pakatikati pa wamlungu kwahera yakawera handa gwenga,

kwahera yakaweza kutenda gagutenda gwenga.

9 Gwee Mtuwa maisi goseri gaguwumbiti, hagizi kukuguwira na

hagabweri ukulu wa litawu lyaku.

10 Gwenga ndo mkulu, gutenda mauzauza,

gwenga gweka yaku ndo Mlungu.

11 Gwee Mtuwa Mlungu, gunfundi njira yaku,

mpati kuwera mwaminika kwaku.

Moyo gwangu goseri gunemeleri kulipanana ligoya litawu lyaku.

12 Gwee Mtuwa Mlungu gwangu, hanikuzyumi kwa moyu gwangu goseri,

habweri ukulu wa litawu lyaku mashaka goseri.

13 Toziya ufiru waku ndo mkulu kwa neni!

Gundopola kulawa kwa yawahowiti.

14 Gwee Mlungu, wantu wana mtiti wankomanga,

shipinga sha wantu wankesela wafira kundaga,

pota wakutirandiri gwenga ata shididini.

15 Kumbiti gwenga Mtuwa, ndo Mlungu gwa lusungu na manemu,

gwenga ndo mhepelera na gwana ufiru uvuwa na waminika.

16 Gung'alambukiri, gumoneri lusungu,

gunupi likakala lyaku neni ntumintumi gwaku,

gumlopoli mwana gwa ntumintumi gwaku mdala.

17 Gwee Mtuwa Mlungu, gunanguziyi lilangaliru lya uheri waku,

su walii yawankalalira wasoniziwi,

pawawona guntanga na kuzyangazyanga.