1 Gwee Mlungu, yanikuzyuma nagunyamala,

2 mana wantu wazyanga na wapayira, wantakulira madoda.

Watakula mpayu toziya yaneni.

3 Watakula makontola toziya neni,

na kunkomanga pota likosa.

4 Tembera niwafiriti womberi wankomangiti,

kumbiti neni niwaluwiriti.

5 Wandipa ukontola kwa maheri ganeni,

na nkalaliru kwa ufiru wangu.

6 Wankondu waneni watakula, mumsakuli muntu mkontola kasingani nayu,

na yakamsitaki kamjegi kumahakama.

7 Pakatozwa kapatikani na likosa,

na pakaliteteya kongera likosa limonga.

8 Mashaka ga makaliru gakuyi gaweri madidini,

muntu yumonga katoli lihengu lyakuyi!

9 Wana wakuyi waweri wahera tati,

na mdala gwakuyi kaweri mkenja!

10 Wana wakuyi wayeriyeri na kuluwaluwa,

wawigwi mumahami ga numba zawu!

11 Yakamshonga shintu kampoki lunda yakuyi yoseri,

na wahenga watoli mpatiru zakuyi zoseri!

12 Napawera na muntu gwa kumwonera lusungu,

ama kuwalera wana wakuyi yawahera tati.

13 Wiwuka wakuyi woseri wahowi,

litawu lyakuyi liwaluwi mushiyiwuku shashiza.

14 Mtuwa Mlungu kawuholi ukontola wa wambuyi wakuyi,

vidoda vya mawu gwakuyi navilekeziwa!

15 Mtuwa Mlungu kaviholi vidoda vyawu mashaka goseri,

su woseri walyaluwiki pasipanu.

16 Mkontola ayu kalisherandiri kutenda maheri,

ila kawawingiti wahushu na yawahera shintu,

na yawatwezuka moyu kawalaga.

17 Kafiriti kupangira wantu,

pangira na impati mweni.

Kawafilirandiri kuwatekelera wamonga,

nayomberi nakatekelerwa.

18 Kwakuyi pangira handa kuvala nguwu,

pangira azi zimuloviyi handa mashi,

zimwigili mumihonju mwakuyi handa lipaki.

19 Pangira imgibikili handa nguwu,

kalitawi handa lugoyi lwa kupota.

20 Mtuwa Mlungu kawawuzilili wantu awa yawashitaki,

awa yawatakula madoda kwa neni.

21 Kumbiti gwee Mtuwa Mlungu, Mtuwa gwangu,

guntangi kwajili ya ligoya lya litawu lyaku,

gundopoli kwajili ya uheri wa ufiru waku!

22 Neni ndo mhushu na nahera shintu,

ntenduwa mpaka mumoyu mwangu.

23 Nagamira handa lisisi lya pashimihi,

ngulusiwa handa wanjombi.

24 Manung'unu gangu gahera likakala kwa koyakuliya,

nsigala mihonju na likuli hera.

25 Wera lijonga hera kwa wantu,

pawawona watikisiya mituwi yawu kwa beziya.

26 Gwee Mtuwa Mlungu, Mlungu gwangu,

gundopoli teratera na ufiru waku.

27 Guwalanguziyi wantu kuwera gwenga ndo yaguntenditi aga,

gwenga Mtuwa Mlungu, ndo yagutenditi hangu.

28 Guwaleki wapangili kumbiti gwenga guntekeleri,

yawankomanga wasoniziwi na neni ntumintumi gwaku nemeleri.

29 Yawasitaki na wasoniziwi,

waligibikili soni yawu handa libulangeti,

30 Hanongi mayagashi kwa Mtuwa Mlungu kwa liziwu,

hanimzyumi pakati pa shipinga shikulu sha wantu,

31 toziya yomberi kamtanga muhushu,

kamlopola shaka pakatozwa.