1 Mufyapiri toziya ya Mtuwa Mlungu mwenga yamumtira,

toziya yomberi kafiruwa kuzyumwa na wantu yawamjimira.

2 Mmuzyumi Mtuwa Mlungu kwa zezi,

mmwimbiri kwa shinubi sha nyuzi lirongu.

3 Mmwimbiri lwimbu lwasyayi,

mgombi shinubi na kufyapira.

4 Shisoweru sha Mtuwa Mlungu ndo sha

nakaka na mirandu yakuyi yoseri ndo ya kwaminika.

5 Mtuwa Mlungu kafira uwaminika na haki,

pasipanu pamema ufiru wa Mlungu.

6 Mpindi zinyawitwi kwa shisoweru sha Mtuwa Mlungu na

vyoseri yaviwera amu kwa pumla ya mlomu gwakuyi.

7 Kajojoniriti pamuhera mashi ga bahari,

handa muntu ntambu yakatula mashi muviwiga vikulu.

8 Pasipanu poseri pamtiri Mlungu!

Woseri yawalikala pasipanu, wampanani ligoya!

9 Toziya kalongiti, napasipanu pawera,

kalaviyiti lilagaliru na peni palilaviya.

10 Mtuwa Mlungu kahalibisiya maholu gawu

na kagagalambula mipangu ya wantu.

11 Kumbiti shilii Mtuwa Mlungu shakamuwiti kushitenda shilikala mashaka goseri,

mipangu yakuyi ilikala viwuka vyoseri.

12 Mbaka isi yeni Mlungu gwakuyi ndo Mtuwa Mlungu,

mbaka walii yakawasyaguliti kuwera wantu wakuyi!

13 Mtuwa Mlungu kalolaga pasi kulawa kumpindi

na kuwona wantu woseri.

14 Kulawa kushiti shakuyi sha ukulu,

kawalola woseri yawalikala pasipanu.

15 Yomberi kayinyawaga miyoyu ya wantu woseri,

yomberi kavimana kila shintu shawatenda.

16 Mfalumi kawezandiri kukanka toziya kana lishonta likulu.

Pota mgangamala kakankandiri kwa makakala gakuyi gatangala

17 Farasi gwa nkondu kafaandiri shintu kwa kupata ukanka,

pota makakala gakuyi gavuwa gamlopolandiri muntu.

18 Mtuwa Mlungu kawalolaga walii yawamguwira,

wantu weni yawatumbira ufiru waku wa mashaka goseri.

19 Yomberi kawalopolaga mukuhowa,

nakawatula wakomu shaka sha njala.

20 Miyoyu ya twenga imtubira Mlungu;

yomberi ndo mtanga gwetu na lusegeyu lwatwenga.

21 Yina tunemelera toziya yakuyi,

twana matumbiru mu litawu lwakuyi linanagala.

22 Gwee Mtuwa Mlungu ufiru waku yawahera upeleru ulikali natwenga,

mana tukutumbira gwenga.