1 Gwee Mlungu, gwenga ndo gwa Mlungu gwangu,

nikusakula kwa moyu goseri,

rohu yaneni ikufira handa muntu yakimiluwa

nyimiluwa handa isi iyuma yayikenteka yahera mashi.

2 Nikuwona pananagala paku,

moni likakala lyaku na uweru waku.

3 Toziya ya ufiru waku yawahera mpeleru,

na milomu yaneni hayikuzyumi.

4 Hanongi mayagashi mumakaliru gangu goseri,

hanyasuli mawoku gangu na kuluwa.

5 Rohu yaneni hayitosiwi handa iliya viboga vinoga,

hanikwimbiri zyuma kwa nemeru.

6 Pawera pashitanda hanikuholi,

pashiru poseri hanikuholeri,

7 toziya guwera mtanga gwangu.

Hanimbi nyimbu zya nemeru pasi palisisi lya mbapatiru zyaku.

8 Rohu yaneni ya pamuhera na gwenga,

liwoku lyaku lya kumliwu lindolera.

9 Kumbiti woseri yawafira kundaga

hawapatukili pasi pawalikala wantu yawahowiti.

10 Hawalaguwi kwa ligumba,

na hawaweri shiboga sha vibweta.

11 Kumbiti mfalumi hakamnemeleri Mlungu,

woseri yawalirapiti kwa litawu lya Mlungu hawamzyumi,

kumbiti wanampayu hawanyamaziwi.