1 Mumzyumi Mlungu!

Mlongi mayagashi kwa Mtuwa Mlungu kwa kuwera ndo mheri,

toziya ufiru wakuyi ulikala mashaka goseri.

2 Gaa yakaweza kutamba matendu makulu ga Mtuwa Mlungu?

Ndo gaa yakaweza kubwera zyuma zyakuyi ntambu yayifiruwa?

3 Watekelerwa walii yawatenda shashifiruwa,

yawatenda mashaka goseri vitwatira vya haki.

4 Gwee Mtuwa Mlungu nagundyaluwa shaka paguwatendera maheri wantu waku,

guntangi shaka paguwalopola,

5 su wezi kuwona ulunda wa wasyagulwa wakuyi,

su nemeleri nemeru ya isi yaku na

su nilitumbi pamuhera na wantu waku.

6 Tutenda vidoda twenga na wambuyi wetu,

tutenda makontola na tutenda madoda.

7 Wambuyi wetu pawaweriti Misri,

walisherandiri matendu gaku ga kulikangasha,

waliholandiri uvuwa wa tanga zaku,

kumbiti wagalambukiti kumpeku ya bahari ya Shamu.

8 Kumbiti Mlungu kawalopoliti toziya litawu lyakuyi,

su kalanguziyi likakala lyakuyi likulu.

9 Kayikalipiliti bahari ya Shamu,

na yeni iyuma,

kawapitisiya amu handa kushiwala.

10 Kawalopoliti mumawoku mwa yawawakalaliriti,

kawalopoliti kulawa kwa makakala ga wankondu wawu.

11 Mashi ga bahari gawagibikiriti wankondu wawu,

kasigalandiri ata yumu gwawu.

12 Ndo pawaminiti visoweru vyakuyi,

wimba zyuma zyakuyi.

13 Kumbiti katepu walilyaluwiti matendu gakuyi,

woya kutumbira magambiziya gakuyi.

14 Wamemiti matamata nkulu kushiwala kulii na

wamjeriti Mlungu kushiwala kulii.

15 Nayomberi kawapanana shilii shawaluwiti,

kumbiti kajega malweri madoda gakuwapungula makakala

16 Kulugonjeru wamwoniriti weya Musa na

Aruni mnanagala gwa Mtuwa Mlungu.

17 Shakapanu litapaka lipantika na kummira Datani na

kumfintira Abiramu na shipinga shakuyi shoseri,

18 motu gwaka pakati pa wantu walii yawawera pamuhera nawa,

guwalunguziya wantu wakontola.

19 Wanyawiti ng'ombi gwa zahabu kulii Horebu,

waguwira shinyagu ashi sha shuma,

20 wawugalambuliti uweru wa Mlungu,

kwa shinyagu sha ng'ombi yakaliya ntundu.

21 Wamulwaluwiti Mlungu yakawalopoliti,

yakatenditi mirandu mikulu muisi ya Misri,

22 makangashu muisi ayi ya Hamu na

mirandu ya kutiriziya mubahari ya Shamu.

23 Mlungu kalongiti hakawangamizi,

kumbiti Musa msyagulwa gwakuyi kingiliya pakati,

kagalewelera maya ga Mlungu nagawagamiziya.

24 Shakapanu wayibeziya isi ilii iherepa,

waminitindiri shakalongiti.

25 Walalamikiti mumalingu gawu,

walemiti kumpikanira Mtuwa Mlungu.

26 Hangu Mlungu kalirapa,

pakalonga, haniwagamiziyi kushiwala,

27 haniwapalasiyi wiwuka wawu pakati pa wantu na

kuwapalasiya pasipanu poseri.

28 Shakapanu waweriti pamuhera na wantu yawamguwira Baali kulii Peori,

waliya tambiku zyawatambikiliti mahoka.

29 Wamkalaziyiti nentu Mtuwa Mlungu kwa Matendu gawu,

malweri madoda galawira pakati pawu.

30 Kumbiti Finehasi kagenda kuwalaga walii yawatenditi makontola

na malweri galii gapera.

31 Kwakutenda hangu kawoneka kuwera na haki,

kwanjira shiyiwuku mpaka shiyiwuku.

32 Wamkalaziyiti Mlungu pamashi ga Meriba,

Musa katabika kwajili yawu.

33 Wambeziyiti rohu gwa Mlungu,

na kumtenda musa katakula visoweru vya uzigizigi.

34 Wawalagandiri wantu wa maisi gamonga,

handa Mtuwa Mlungu ntambu yakawalagaliriti,

35 su walijojonira na wantu wa maisi,

walifunda kutenda mirandu yawu.

36 Waguwiriti vinyagu vya wamlungu wawu,

vyeni viwera mgomiziwu gwa kuwangamiziya.

37 Wawalagiti wana wawu wapalu na wadala,

walaviya tambiku kwa washamshera.

38 Wititi mwazi gwa wantu yawahera na likosa,

mwazi gwa wana wawu wapalu na wadala weni wawalaviyiti tambiku kwa shinyagu sha kanani na

isi idodiziwa na mwazi agu.

39 Hangu walidodiziya kwa matendu gawu,

gawatenditi galifana na wahumba.

40 Hangu Mtuwa Mlungu kawakalaliriti nentu wantu wakuyi,

kakalaziwa nentu na awa yawaweriti lunda yakuyi.

41 Kawalekera mumawoku mwa wantu wa maisi,

na wankondu wawakolamlima.

42 Wankondu wawu wawayoniliti,

wawakolamlima.

43 Mala zivuwa Mtuwa Mlungu kawalopoliti wantu wakuyi,

kumbiti womberi wamgalambukiti,

wendereya kutenda ukontola wawu.

44 Kumbiti Mtuwa Mlungu kalola ntabiku zawu,

shaka pakapikiniriti kulira kwawu,

45 Kwajili yawu kaliholiti lipatanu lyawu,

kawawonera lusungu kwa ufiru wakuyi uvuwa.

46 Kawatenditi yawawayoneriti Waisraeli,

wawawoneri lusungu.

47 Gwee Mtuwa Mlungu, Mlungu gwetu, gutulopoli

gutujojoniri pamuhera kulawa mu maisi,

su tuligambiri mayagashishi litawu lyaku linanagala na

kulitumbira zyuma zyaku.

48 Kazyumwi Mtuwa Mlungu, Mlungu gwa Israeli,

mashaka goseri!

Na wantu woseri walongi, amina!

Kazyumi Mtuwa Mlungu!