1 Nikufira gwee Mtuwa Mlungu,

yagumpanana likakala.

2 Mtuwa Mlungu ndo litalabuhi lyangu,

liboma lyangu na mkombola gwangu,

Mlungu gwangu, litalabuhi lyangu,

kwakuyi ntugira uponera,

lusegeyu lwangu,

yomberi ndo ulopola waneni na liboma lyangu.

3 Nimshema Mtuwa Mlungu yakafiruwa zyumwa kantangi,

naneni ndopolwa kulawa kwa wankondu wangu.

4 Makupala ga mashi yagahowiziya gazyengetiti,

makakala ga mashi gankangaliti.

5 Likakala lya kuzimu linzyengetiti,

miyambiru ya kuhowa iweriti kulongolu gwaneni.

6 Mukutabika kwaneni nimshemiti Mtuwa Mlungu,

nimliliti Mlungu gwangu kantangi.

Kapikiniriti liziwu lyangu kulawa Kuhekalu,

kapikanira shiwembu sha kuluwa utanga.

7 Pasipanu palendemera na kutikinyika,

miyanjiru ya migongu iwegukaweguka,

toziya Mlungu kaweriti kakalala.

8 Lyosi litumiti kulawa mumpula mwakuyi,

motu yagulunguziya gulawa mumulomu mwakuyi,

vilavilii namakala ga motu.

9 Kapantiti liyera, kasuluka pasi,

na liwundi lititu pasi pa magulu gakuyi.

10 Kakweniti pampindi pa shiwumbi shana mpapatiru kaguluka,

kaguluka kalongola panani pa mpambatiru za lyega.

11 Kaligibikiti luwindu,

kalizyengetiriti mawundi gazotopa ga mashi.

12 Lumeta lumulikiti kulongolu kwakuyi,

mumawundi kulawira mvula ya mabuwi

na makala ga motu.

13 Mtuwa Mlungu Kaguguma kulawa kumpindi,

liziwu lya Mlungu yakawera kumpindi nentu lipikinilika.

14 Kawagumiti wankondu misali yakuyi kawapalasiya,

kamulikiti lumeta, kawatenda watugi.

15 Matiwa ga bahari gavugulwa,

miyanjiru ya pasipanu iwonekana,

toziya ya nguguma yaku ya nkondu,

na toziya ya pumula yaku.

16 Mtuwa Mlungu katalipisiyiti liwoku lyakuyi kulawa pampindi kantola,

kanyasuliti kulawa mumashi gavuwa.

17 Kandopola kulawa kwa wankondu wangu wana likakala livuwa,

kandopola kulawa kwa awa yawankalaliriti,

toziya waweriti na likakala kunkanka.

18 Wankomangiti paweriti mkutabika,

kumbiti Mtuwa Mlungu kaweriti mlolera gwangu.

19 Kanjegiti na kuntula pahala pa uponera,

kaponiziyiti, toziya kafiriziyitwi naneni.

20 Mtuwa Mlungu kanfupiti toziya ya uwaminika wangu,

kantekeleriti toziya ntenditi shashifiruwitwi kulongolu kwa Mlungu.

21 Toziya nfata njira ya Mtuwa Mlungu,

pota kulitula gweka na Mlungu gwangu kwa ukontola.

22 Nkola malagaliru gakuyi goseri,

ndekitindiri kufata vyakandagaliriti.

23 Kulongolu kwakuyi weritindiri na likosa,

nilishinga nawera na vidoda.

24 Mtuwa Mlungu kantuliti weri ntambu ya uwaminika wangu,

yomberi kavimana handa ntenda shashifiruwa kulongolu kwakuyi.

25 Kwa walii yawawera waminika Gwenga Mlungu gwa mwaminika,

na kwa walii yawahera likosa gwenga gwahera likosa.

26 Kwa yawawera wananagala gwenga Mlungu gwa mnanagala,

kumbiti yawawera wakontola gwenga guwera mnkesela.

27 Gwenga guwalopola yawawera wananaga,

kumbiti yawalikweniziya guwasulusiya.

28 Gwee Mtuwa Mlungu, gumulikira mumoyu mwangu,

gwee Mtuwa Mlungu, Mlungu gwangu guluwusiya luwindu mungati mwangu.

29 Kwa utanga waku nkomanga shipinga,

gwenga gunupa likakala lya kubomola maboma ga wankondu wangu.

30 Matendu gakuyi Mlungu gateratara!

Shakalongiti Mtuwa Mlungu ndo shakwaminika,

yomberi lusegeyu kwa woseri yawamtugira.

31 Mtuwa gweka yakuyi ndo Mlungu,

Yomberi Mlungu gwetu ndo yakawera litalabuhi lya uponeru,

32 yomberi ndo yakanupa likakala,

na kuyitenda poneka njira yaneni.

33 Kagagangamaziya magulu gangu handa ga fyembi,

na kuntula poneka pampindi pa migongu.

34 Kanfunda kulikomanga nkondu,

mawoku gangu gawezi kunika upindi wa shaba.

35 Gumpanana lusegeyu lyaku lya kundolera,

liwoku lyaku lya kumliwu lintanga

na kulisulusiya kwaku kuntenda weri mkulu.

36 Gupanula njira toziya yangu,

magulu gangu nagatyerebuka.

37 Niwafatiti wankondu wangu na kuwabata,

hapenimbuyi kumbeli mpaka wamaliriki.

38 Niwakomangiti na wawezandiri kugoloka kayi,

waguwiti pasi pamagulu gangu.

39 Gwenga gumpananiti likakala lya kulikomanga nkondu,

guwasulusiyiti wankondu pasipangu.

40 Guwatenditi wankondu wangu watugi,

na walii yawankalaliriti niwalagi.

41 Wasakuliti gwakuwatanga kumbiti paweritindiri gwa kuwatanga,

wamliliriti Mtuwa Mlungu kumbiti kawankulandiri.

42 Niwaposhola wawera gambira lidiku,

lyaligulusiwa na lyega.

Niwatimbatimba handa lidiku lya munjira.

43 Gwenga gundopola na makomangu ga wantu,

guntenda mkolamlima gwa maisi,

wantu yaniwamanandiri wantendiriti.

44 Katepu pawapikiniriti visoweri vya ukanka wangu wanjimiriti;

wahenga waniziriti pawananaga,

45 na kutwezuka moyu,

wiza kulawa mumaboma gawu pawalendemera.

46 Mtuwa Mlungu mkomu! Kazyumwi litalabuhi lya uponeru wangu,

kakwiswi Mlungu gwa ulopola wangu.

47 Yomberi kantenda mbuziliri shilii sha ntendilitwi,

na kugatenda maisi gaweri pasi pangu.

48 Kandopola kulawa kwa wankondu wangu,

na kunkuliziya pampindi pa wasingani wangu,

na kumponiziya kutali na wantu wankesera.

49 Hangu hanikukwisi pakati pa maisi,

gwee Mtuwa Mlungu hanikwimbili zyuma,

50 toziya gumpanana mfalumi ukanka mkulu,

nakumlanguziya utanga msyagula gwakuyi,

Daudi na wiwuka wakuyi mashaka goseri.