Zabuli 43

Luwa ya ukombolwa

1 Gwee Mlungu gunanguziyi handa nahera likosa,

gunteteyi mushitwatila ashi kwa wantu wadoda,

gundopoli na wantu wanampayu na wakontola.

2 Ntugira uponera kwa gwenga gwee Mlungu,

ntambu gaa gunasira kutali?

Su ng’endi ugawu na ugawa pandaya

kwa kuwonerwa na wankondu wangu?

3 Gunjegeli uweru wa gwenga na unakaka gwenga vinonguziyi,

gunjegeli kulugongu lwaku lunanaga,

pahala paku pa kulikala.

4 Panu, gwee Mlungu, hang’endi pakutambikira paku,

hanizi kwa gwenga, gwee Mlungu, kwa nemeru nkulu.

Hanikuzyumi kwa zezi,

gwee Mlungu, Mlungu gwangu.

5 Mbona hinginika hangu mmoyu?

Ntambu gaa moyu gwangu gwankugazika?

Hanimtimbili Mtuwa Mlungu, mana hanimkwisi kayi,

yomberi yakawera mtanga gwangu

na Mlungu gwangu.