1 Mmwimbiri Mtuwa Mlungu lwimbu lwasyai!

Mwenga wantu wa pasipanu poseri mumwimbiri Mtuwa Mlungu.

2 Mmwimbi Mtuwa Mlungu na kulizyuma litawu lyakuyi.

Mubweri ulopola wakuyi kila lishaka.

3 Mgabweleri maisi uweru wakuyi,

muwagambiri wantu woseri matendu gakuyi gakulikangasha.

4 Toziya Mtuwa Mlungu ndo mkulu, kazyumwa nentu,

kafiruwa kutirwa kuliku wamlungu woseri.

5 Toziya Wamlungu wa maisi gamonga shintundiri,

kumbiti Mtuwa Mlungu kawumbiti mpindi.

6 Uweru na ligoya vimzyengeta,

likakala na ukulu viyimemiziya Numba Nkulu yakuyi.

7 Mwenga wantu wa maisi goseri mumpanani ligoya Mtuwa Mlungu,

mumzyumi Mtuwa toziya ya uweru na likakala lyakuyi.

8 Mlizyumi litawu lyakuyi liweru,

mjegi tambiku na kwingira mu Numba Nkulu mwakuyi.

9 Mmuguwiri Mtuwa Mlungu toziya yomberi ndo mnanagala.

Mlendemeri kulongolu kwakuyi mwenga wantu wa pasipanu poseri!

10 Mgagambiri maisi, "Mtuwa Mlungu kakolamlima!

Kapagangamaziya pasipanu na hapeni patikinyiki.

Hakawatozi wantu kwa haki."

11 Mpindi na pasipanu vinemeleri!

Bahari na ivumi pamuhera na vyoseri yaviwera amu!

12 Mnemeleri mwe malambu na vyoseri vyaviwera amu!

Shakapanu mitera yoseri ya kulidowi hayiyimbi kwa nemeleri,

13 kulongolu kwa Mtuwa Mlungu yakiza,

yakiza kupatoza pasipanu,

hakapatozi pasipanu na maisi goseri kwa haki.