1 Gwee Mtuwa Mlungu, Mlungu gwangu, nikutugira gwenga,

gundopoli na gunkomboli nawoseri yawanfata kwa udoda,

2 Hera hangu, hawizi kumpapula handa simba,

pawanyofolanga pota napawera na gwa kundopola.

3 Gwee Mtuwa Mlungu, Mlungu gwangu,

Handa ntenda aga,

ama ntenda madoda,

4 ama nimtendara madoda ganja gwangu,

ama nimkomanga mnkondu gwangu pota toziya,

5 su, mnkondu na kanfati na kumpata,

kantimbangi,

nakandeki nfuwiri pasi.

6 Gwee Mtuwa Mlungu kwa maya gaku,

gugoloki kwajili ya makomangu ga wankondu waneni.

Gugoloki toziya yaneni,

gwenga guhimiziya haki itendeki,

7 gugajojoniri maisi kubwegabwega kwaku na gwenga gugakolimlima kulawa pampindi.

8 Gwee, Mtuwa Mlungu, gwankugatoza maisi,

nagunanguziyi kuwera nahera vidoda,

toziya nahera makosa.

9 Guumaliri ukontola wa wantu wadoda,

guwagangamaziyi wantu waheri,

toziya gwee Mlungu ndo yaguwera mwaminika,

na yaguzimana bada za miyoyu na maholu gwa wantu.

10 Mlungu ndo lusegeyu lwangu,

yomberi kawalopola wanamoyu guherepa.

11 Mlungu ndo mtoza gwa haki,

Kawatoza yawatenda makontola.

12 Wantu pawalekandiri vidoda,

Mungu hakakuwi ligumba lyakuyi na

hakaniki upindi wakuyi kuwuloliziya kwakaguma.

13 Hakatandi vikomangiru vikalipa na

kuyitanda kala kuguma misali yakuyi yayiwaka motu.

14 Guloli, Muntu mdoda kamema makontola,

kapanga uhalibisiya

na kulera upayira.

15 Kabawa lirindi,

Shakapanu kapatukira mulirindi lyakabawiti ulamweni.

16 Uhalibisiya wakuyi hawumuwuyiri ulamweni,

unkesera wakuyi hawumguwili ulamweni.

17 Hanongi mayagashii Mtuwa Mlungu toziya yomberi ndo gwa haki,

hanimwimbili zyuma Mtuwa Mlungu, Mlungu Mkulu.