1 Mumwimbili Mtuwa Mlungu lwimbu lwa syayi,

mana katenda mirandu ya kulikangasha!

Kwa makakala gakuyi na uwezu wakuyi mnanagala,

avi vimmpanana ukanka uvuwa.

2 Mtuwa Mlungu kawutenda ulopola wakuyi umanikani,

haki yakuyi imanikana kwa maisi.

3 Kalihola ufiru na waminika wakuyi kwa Waisraeli,

pasipanu poseri pawuwona ulopola wa Mlungu gwetu.

4 Wantu wa pasipanu poseri wamfyapiliri Mtuwa Mlungu,

wamfyapiliri kwa nyimbu za nemeru.

5 Mmuzyumi Mtuwa Mlungu kwa lingutinguti,

kwa lingutinguti na liziwu lya kwimba,

6 kwa lipenka na liziwu lya lipenka lya magoli,

mnemeleri kulongolu kwa Mtuwa Mlungu.

7 Bahari na ivumi na vintu vyoseri yaviwera amu,

pasipanu na woseri yawalikala mngati mwakuyi.

8 Nshemba nayikomi mapopu,

migongu yimbi pamuhera kwa nemeru,

9 kulongolu kwa Mtuwa Mlungu,

mana kankwiza kupatoza pasipanu.

Hakapatozi pasipanu kwa haki na wantu wa maisi kwa uaminika.