1 Gwee Mlungu, gumoneri lusungu,

mana wantu wankunkomanga.

Paluwala poseri wankondu wankuntabisiya neni.

2 Paluwala poseri wankondu wangu wankunkomanga,

ndo wavuwa nentu yawalikomanga na neni.

3 Gwee Mlungu mkulu, lyoga palinkola,

neni nikutumbira gwenga.

4 Nimtumbira Mlungu na kushizyuma shisoweru shakuyi,

nimtumbira Mlungu, pota ntirandiri,

Muntu yakiwuka na kuhowa hakantendi shishi?

5 Paluwala poseri wapotoziya galii gantakuliti,

mipangu yawu yoseri wafira kundaga.

6 Waliwona pahala pa bada

pawalolola goseri gantenda,

wangwandira kwa nfiru ya kundaga.

7 Gwee Mlungu, guwalipi teratera na ukontola wawu,

guwagusiyi wakontola awa kwa maya gaku.

8 Gwenga gukumana kutabika kwangu,

gutula liholu lya masozi gangu goseri.

Hashi, goseri gamushitabu shakundiri?

9 Shaka shoseri shanikuluwa utanga waku,

wankondu waneni wawuziwa kumbeli.

Nakaka nivimana Mlungu kapamuhera na waneni.

10 Nimtumbira Mlungu na kushizyuma shisoweru shakuyi,

nimtumbira Mtuwa Mlungu na kuzyuma shisoweru shakuyi.

11 Nimtumbira Mlungu, pota ntirandiri.

Muntu yakiwuka na kuhowa hakantendi shishi?

12 Gwee Mlungu, hantendi shantakuliti kwagwenga,

hanikulaviliri tambiku za kulonga mayagashii,

13 mana gundopola mukulaguwa,

yina, gundolera nanguwa pasi,

gwee Mlungu mpati kulikala kulongolu kwaku na

muulangala wa ukomu.