1 Gwee Mtuwa Mlungu, mlopola gwangu,

Ndira paluwala poseri,

na pashiru nankwiza kulongolu kwaku.

2 Luwa ya neni isoki kwaku,

gupikanili kulira kwa neni.

3 Madoda gavuwa gampata,

neni sambira howa.

4 Woneka gambira muntu yakafira kuhowa,

makakala gangu goseri gampelera.

5 Ndulwa pamuhera na wantu yawahowiti,

handa yawalagwitwi, yawawera mlisembi,

walii yaguwahola kayi ndiri,

weni watulwa gweka na ulolera waku.

6 Gunasa kulisembi litali,

pasi ng'anji paluwindu dunyu.

7 Maya gaku gantopera,

guntabisiya kwa makupala gaku goseri.

8 Guwatenda waganja waneni wantugi,

guntenda kuwera likalaliru kwawomberi.

Ng'omiziwa, wezandiri kutuga,

9 Masu gangu gatifutifu kwa kwinginika.

Kila lishaka nikulilira, Gwee Mtuwa Mlungu,

nikunyasulira mawoku gangu guntangi.

10 Hashi, gwenga guwatendera yawahoti makangashu gaku?

Hashi, yawahowiti wazyuka na kukuzyuma?

11 Hashi, ufiru waku ukantwa kulisembi,

ama uwaminika waku pahala pa maagamiziya?

12 Hashi, makangashu gaku gamanikana mluwindu amu,

ama mirandu ya haki muisi yayilyaluwikitwi?

13 Kumbiti neni nikulilira, gwee Mtuwa Mlungu guntangi,

kila mandawira nikuluwa.

14 Gwee Mtuwa Mlungu, hashi gunasira kutali?

Ntambu gaa gunasa?

15 Ntabika na sambira howa kwanjira untemba wangu,

ntabika kwa makomangu gaku na ntoka nentu.

16 Maya gaku gangalapira,

makomangu gaku ga kutiriziya gantenda,

17 gazyengeta handa malawa paluwala poseri,

gazyengeta wega zoseri kwa pamuhera.

18 Guwatenda waganja na wapakwegera wangu woseri wanshapiri,

luwindu ndo ganja gwangu.