Zabuli 53

Ukontola wa wantu

1 Mzigizigi kalitakuziya mumoyu kwahera Mlungu.

Woseri wakoseya nakamu,

watenda mirandu ya kukalaziya,

kwahera ata yumu yakatenda liheri.

2 Mlungu kawalola wantu pakawera kumpindi,

su kawoni handa kwana yoseri kana luhala

handa kwana yoseri yakamsakula Mlungu,

3 kumbiti woseri wakulema,

woseri wapotoka,

kwahera yakatenda liheri, kwahera ata yumu.

4 Mlungu kakosiya hashi, awa yawatenda makontola wahera mahala?

Wankuwamemena wantu wa neni ntambu yawaliya mabumunda

pota wanguwirandiri neni Mlungu.

5 Awa hawaweri na lyoga likulu,

lyoga lyeni hawenipati kuliwona,

mana Mlungu hakayipalasiyi mihonju ya wankondu,

na hawasoniziki mana Mlungu kawalema.

6 Meyiherepi handa ukombola wa Israeli meusoki kulawa sayuni.

Mlungu pakawuziya ntambu ya kwanja ya wantu wakuyi,

wiwuka wa Yakobu hawafyapiliri na Waisraeli hawanemeleri.