1 Mumzyumi Mtuwa Mlungu!

Mlizyumi litawu lya Mtuwa Mlungu,

mumzyumi mwenga wantumintumi wa Mtuwa Mlungu,

2 mwenga yamtenda lihengu mu numba yakuyi,

mu ligeleri lya numba ya Mlungu gwetu.

3 Mumzyumi Mtuwa Mlungu toziya yomberi ndo mheri,

mumkwisi kwa lwimbu toziya litawu lyakuyi ndo liherepa.

4 Mtuwa Mlungu kamsyagula Yakobu kuwera gwakuyi,

na wantu wa Israeli kuwera uhala wakuyi.

5 Nivimana nakaka kuwera Mtuwa Mlungu ndo mkulu,

Mtuwa gwetu ndo mkulu kuliku wamlungu woseri.

6 Mtuwa Mlungu katenda shoseri shakafira,

kumpindi na pasipanu na kubahali na kumashi matali.

7 Ndo yakajega mawundi kulawa mpeleru zya pasipanu,

katenda lumeta pamuhera na mvula,

na kuvumisiya lyega kulawa hanja zakuyi.

8 Kawalagiti wiwuka wa kwanja aku Misri,

wiwuka wa wantu na wankanyama viraa.

9 Katenditi langiru na makangashu aku Misri,

na kwa Farao na wantumintumi wakuyi woseri.

10 Kagayagamiziyiti maisi gavuwa,

kawalaga wafalumi yawana makakala.

11 Mfalumi Sihoni gwa Waamori,

mfalumi Ogu gwa Bashani,

na wafalumi woseri wa Kanaani.

12 Katoliti isi zawu na kuwapanana wantu wakuyi,

ziweri uhala kwa wantu wakuyi Israeli.

13 Gwee Mtuwa Mlungu, litawu lyakuyi lilikala mashaka goseri,

haguholwi viyiwuku mpaka viyiwuku.

14 Mtuwa Mlungu hakawateteyi wantu wakuyi,

na kuwawonera lusungu wantumintumi wakuyi.

15 Wamlungu wa maisi wanyawiwa na madini ga feza na zahabu,

inyawiwa kwa mawoku ga wantu.

16 Yana milomu kumbiti itakulandiri,

yana masu kumbiti iwonandiri.

17 Yana makutu kumbiti ipikinirandiri,

pota iwezandiri kupumula.

18 Woseri yawayinyawiti waweri handa womberi,

na woseri yawayitumbira.

19 Mwenga wantu wa Israeli, mumkwisi Mtuwa Mlungu!

Mwenga watambika, mumkwisi Mtuwa Mlungu!

20 Mwenga Walawi, mmukwisi Mtuwa Mlungu!

Mwenga yamumguwira Mtuwa Mlungu mumkwisi yomberi!

21 Kazyumwi Mtuwa Mlungu mu Sayuni,

kakwisi mu makawu gakuyi Yerusalemu.

Mumzyumi Mtuwa Mlungu!