1 Gwee Mlungu gwangu gundopoli na wakondu wangu,

gungomboli na awa yankomanga.

2 Gundopoli na awa yawatenda makontola,

gumponiziyi kulawa kwa awa yawalaga!

3 Gulori! Wankungwadira wandagi,

wantu wangesera yawasongiziya ndewu kwaneni.

4 Ntendandiri likosa kumbiti wankunkomanga,

gwimuki guntanki, gwee Mtuwa Mlungu.

5 Gugoloki Gwee Mtuwa Mlungu, Mlungu yakana likakala, Mlungu gwa Israeli.

Gugoloki, guwakomangi wantu awa yawakumanandiri,

naguwaleka awa yawapanga madoda.

6 Kila pashimihi wawuya,

pawawunguruma gambira ng'ang'a na kuyerayera kumjini.

7 "Gupikaniri, mahigirangu yagalawa mumilomu mwawu,

visoweru vyawu vyankulimbatula handa ligumba likalipa,

kayi wankulihola kwahera yakawapikinira."

8 Kumbiti gwenga Mtuwa Mlungu guwaseka,

guwajongera wantu awa wa isi zoseri yawakumanandiri.

9 Gwee Mlungu, gwa liboma lyangu,

hanikuheperi gwenga yaguwera likakala lyangu.

10 Mlungu gwangu hagunizili na tanga yaku,

haguntendi moni wankondu wangu pawasinda.

11 Kumbiti gwenga Mlungu naguwalaga kwa mala yimu wankondu awa, su wantu wangu nawiza kulyaluwa,

ila guwakomi mpolimpoli kwa likakala lyaku, naguwapatuziyi pasi, gwee Mtuwa,

gwenga ndo liboma lyetu.

12 Womberi watenda vidoda kwa goseri gawatakula,

na wagomiziwi kwamtiti gwawu!

Toziya ya pangira na upaya wawu.

13 Guwahalibisiyi kwa maya gaku,

guwahalibisiyi nawawera kayi, su wantu woseri wavimani kuwera gwenga gwa Mlungu.

Guwakolamlima wiwuka wa Yakobu ata mpaka upeleru wa pasipanu.

14 Kila pashimihi wawuya pawawunguruma gambira ng'ang'a

na kuyerayera kumjini.

15 Watyangatyanga pawasakula shiboga

na pawikutandiri wendeleya kuguguma pashiru poseri.

16 Kumbiti neni hanimbi zyuma kwa likakala lyaku,

hanfapiliri mandawira kwa ufiru waku,

mana gwenga guwera liboma lyangu,

natugira ya neni shaka sha kutabika.

17 Gwee Mtuwa Mlungu yaguwera likakala lyangu,

hanikwimbiri zyuma,

mana gwenga guwera liboma lyangu, Mlungu yagunfira.