1 Wakuzyumwa twengandiri, gwee Mtuwa Mlungu,

ila gwenga gwekayaku,

toziya ya ufiru waku na uaminika waku.

2 Hashi maisi galongi,

"Mlungu gwenu ka koshi?"

3 Mlungu gwetu ka kumpindi,

yomberi katenda loseri lyakafira.

4 Wamlungu wawu ndo ya madini ga feza na zahabu,

wanyawiwa kwa mawoku ga wantu.

5 Wana milomu kumbiti watakulandiri.

Wana masu kumbiti wawonandiri.

6 Wana makutu kumbiti wapikanirandiri.

Wana mpula kumbiti wanusiyandiri.

7 Wana mawoku kumbuti wakolandiri.

Wana magulu kumbiti wagendagendandiri,

pota makulamiru gawu galaviyandiri liziwu.

8 Woseri yawazinyawa hawaweri gambira womberi,

ntambuiraa na woseri yawayitumbira.

9 Mwenga wantu wa Israeli, mmutumbiri Mtuwa Mlungu,

yomberi ndo mtanga gwenu na liboma lyenu.

10 Mwenga wiwuka wa Aruni, mmutumbiri Mtuwa Mlungu,

yomberi ndo lusegeyu lwenu na liboma lyenu.

11 Mwenga yammuguwira Mtuwa Mlungu, mmutumbiri,

yomberi ndo lusegeyu lwenu na liboma lyenu.

12 Mtuwa Mlungu katuhola na hakatutekeleri,

hakawatekeleri wantu wa Israeli,

hakawatekeleri wiwuka wa Aruni.

13 Hakawatekeleri woseri yawamguwira,

hakawatekeleri wakulu kwa wapusu.

14 Mtuwa Mlungu kawatendi mwongereki,

kawongeri mwenga na wiwuka wenu!

15 Mtekelerwi na Mtuwa Mlungu,

yakaziwumbiti mpindi na pasipanu.

16 Mpindi ndo yakuyi Mtuwa Mlungu,

kumbiti pasipanu kawapanana wantu.

17 Yawahowiti wamuzyumindiri Mtuwa Mlungu,

pota walii yawasuluka muisi ya wantu yawahowiti.

18 Kumbiti twenga yatuwera wakomu twankumzyuma Mtuwa Mlungu,

kwanjira vinu mpaka mashaka goseri.

Mmuzyumi Mtuwa Mlungu!