1 Gwee Mlungu gundopoli,

mana mashi gamusingu.

2 Mpatukira mulidika livuwa,

kwahera ata pahala pa kugoloka.

Mpatukira mumashi matali,

makupala gantola.

3 Ntoka kuluwa utanga

mpaka lukulamiru lwaneni luyuma.

Na masu ganeni gafifiya,

panikuhepera gwee Mlungu gwangu.

4 Walii yawankalalira pota toziya

ndo wavuwa kuliku viri za mtuyi gwangu.

Wanamakakala nentu awa yawafira kundaga,

awa yawankomanga kwa vitwatira vya mpayu.

Hashi, mbuziyi shintu shaniwandiri?

5 Gwee Mlungu, guwuumana ungalimahala waneni,

vidoda vyaneni vififikandiri kwagwenga.

6 Yawakutumbira nawasoniziwa toziya yaneni,

gwee Mtuwa Mlungu gwa mashonta,

yawakusakula nawasoniziwa toziya yaneni,

gwee Mlungu gwa Israeli.

7 Nsoniziwa toziya ya gwenga,

soni igubika sheni shaneni.

8 Wera mhenga kwa walongu wangu,

wana wa mawu gwangu wamanandiri.

9 Weya waneni kwa numba yaku umalira.

Visoweru vidoda vyoseri vyawakulavilira gwenga vimpata neni.

10 Pandiriti na koya kuliya,

wantu wambeziyiti.

11 Panvala nguwu za mafafa su kudaya,

womberi wansekiti.

12 Wantu yawalikala mumigomi ya mji wantakulanga,

walowera wantungira nyimbu.

13 Kumbiti neni nikuluwa gwenga,

gwee Mtuwa Mlungu,

kwa shaka shagushifira kwa ufiru waku mkulu gunankuli,

toziya ulopola waku wa unakaka.

14 Kwa utanga waku gundopoli nandodomera mumadika,

gundopoli na awa yawankalalira,

gundopoli kulawa mumashi matali.

15 Nagundeka njegwi na lirawa,

ama mpatukiri mumashi matali,

ama nagundeka ngibikirwi na lisembi.

16 Gwee Mtuwa Mlungu, gunankuli kwa uheri wa ufiru waku,

gundoli kwa lusungu lwaku lukulu.

17 Nagunfifa sheni shaku neni ntumintumi gwaku,

gunankuli kalongola, toziya namuntabiku.

18 Guniziri pakwegera na kundopola,

gunkomboli na wankondu wangu.

19 Gwenga guvimana ntambu yanigirangwa,

viraa guvimana ntambu yasoniziwa na

wankondu wangu woseri gwenga guwamana.

20 Ntwezuka moyo kwa mayigirangu

na neni mbuya kumberi

Nsakula gwa kunyamaziya kumbiti nimpatandiri,

na gwakunkola mawoku kumbiti nimpatandiri.

21 Watula usungu mushiboga shangu

na paweriti nyumiluwa wanupa siki nandi.

22 Matandiru ga shiboga shawu na gaweri mgomiziwu kwawomberi

na viraa iweri mgomiziwu kwa wamaganja wawu.

23 Masu gawu galekelwi luwindu nawaweza kuwona,

guyilendemeziyi mashaka goseri migongu yawu.

24 Guwitiri maya gaku,

maya gaku gawapati.

25 Kaya zyawu mahami,

nakalikala yoseri mng'onjeru zawu.

26 Toziya wawatabisiya walii yaguwakomiti,

na kuyowelera utama wawu walii yawatenduwitwi.

27 Guwongeri makomangu,

naguwaleka wapati ulopola waku.

28 Guwafuti mushitabu sha yawawera wakomu,

nawawera muwalanga ya wantu yawajimirwa na Mlungu.

29 Kumbiti neni monerwa na mlweri,

gwee Mlungu gunyasuli kumpindi na gundopoli.

30 Kwa lwimbu hanilizyumi litawu lya Mlungu,

Hanimkwisi kwa mayagashi.

31 Mlandu agu hagumfiriziyi Mtuwa Mlungu nentu, kuliku kumlavilira tambiku ya ng'ombi shipalu,

kuliku kumlavilira tambiku ya ng'ombi shipalu mkulu pakawera na magoli na vipaga vyakuyi.

32 Wananaga hawawoni aga na kunemelera,

yawampanana ligoya Mlungu hawapati moyu.

33 Mtuwa Mlungu kawapikinira wahushu,

hapeni kawalyaluwi nakamu wantu wakuyi yawatatirwa.

34 Mpindi na pasi panu zimzyumi Mlungu,

bahari na vyoseri yaviwera amu, vimzyumi.

35 Toziya Mlungu hakagulopoli mji gwa Sayuni

na kuyinyawa kayi miji ya Yuda.

Wantu wakuyi hawalikali amu kuyikolamlima,

36 Wana wa wantumintumi wakuyi hawayihali,

walii yawalifira litawu lyakuyi hawalikali amu.