1 Mbaka muntu yakashera wahushu,

Mtuwa Mlungu hakamlopoli shaka sha ntabiku.

2 Mtuwa Mlungu hakamloleri

na kumtula mkomu na yomberi hakaweri na mpatiru muisi,

Mlungu hapakamleki mumawoku mwa wankondu wakuyi.

3 Mtuwa Mlungu hakamtangi pakawera mlweri

hakamponiziyi malweri gakuyi goseri.

4 Naneni ntakuliti "Guntangi,

gwee Mtuwa Mlungu, gumoneri lusungu toziya nikutenda vidoda."

5 Wankondu wangu watakulaga vidoda kwaneni,

"Hakahowindii na litawu lyakuyi naliwerakayi!"

6 Pawantyangira walonga visoweru vyahera mpatiru kwaneni,

wampikanira su wapati visoweru vya ulweri wangu,

pawasoka kunja wawabwelera wamonga.

7 Woseri yawankalalira walininitira toziya ya neni,

wafira madoda gampati.

8 Walonga, "Malweri aga hagamlagi,

pashitanda palii hapenikaponi kayi!"

9 Ata ganja gwangu gwakumoyu yanimwaminiti,

yakaliyiti shiboga pamuhera naneni,

kangalambuka kunkomanga!

10 Gwee Mtuwa Mlungu, gumoneri lusungu! Gumponiziyi,

su neni niwawuziliri shawantendiriti.

11 Panu hanivimani handa gufiriziwa naneni,

wankondu wangu pawankankandiri.

12 Gwenga guntanga toziya ntenda maheri,

guntula kulongolu kwaku mashaka goseri.

13 Kazyumwi Mtuwa, Mlungu, Mlungu gwa Israeli,

mashaka goseri!