1 Mumzyumi Mtuwa Mlungu!

Mana ndo iherepa kumzyuma Mlungu gwetu!

Yomberi ndo mheri na kafiruwa kwimbirwa zyuma.

2 Mtuwa Mlungu kanyawa kayi mji gwa Yerusalemu,

kankuwawuziya Waisraeli yawaweriti kuuhamisiwu.

3 Kankuwaponiziya yawatwezuka moyu,

na kuwatawa malonda gawu.

4 Kawalanga ntondu zoseri,

na kuzipanana matawu.

5 Mtuwa gwetu ndo mkulu na kana makakala nentu,

umani wakuyi wahera mpaka.

6 Mtuwa Mlungu kawanyasula wananaga,

kumbiti kawasira wakontola mumalivu.

7 Mumwimbiri Mtuwa Mlungu nyimbu za mayagashi,

mumgomberi lugombugombu Mlungu gwetu!

8 Yomberi kaligibikira liyera kwa mawundi,

kayitandira isi mvula,

na kutomiziya ntundu kuvigongu.

9 Kawapanana wankanyama shiboga shawu,

na kuwaliyiziya wana wa kungulu pawalira.

10 Yomberi kafirandiri makakala ga farasi,

pota kafiliziwandiri na ugangamala wa wanjagira,

11 kumbiti kafiliziwa na wantu yawamguwira,

wantu yawatumbira ufiru wakuyi.

12 Gwee Yerusalemu, gumzyumi Mtuwa Mlungu.

Gwee Sayuni, gulongi mayagashii kwa Mlungu gwaku.

13 Toziya yomberi kagangamaziya migomi yakuyi,

kawatekelera wantu yawawera mngati mwakuyi.

14 Kakupanana ponga mumpaka mwaku,

kakwikutuziya viboga viherepa.

15 Yomberi kajega lagalira yakuyi pasipanu,

shisoweru shakuyi shitenda shakafiriti kalongola.

16 Katandaziya seluji handa mibahira,

kapalasiya mangami handa malivu.

17 Katowa mvula ya mabuwi handa kokotu

kwahera yakaweza kuhepelera mpepu yakuyi.

18 Kalagalira shisoweru shakuyi shilumbujuka,

kavumisiya lyega lyakuyi, liwera mashi.

19 Kamgambiriti Yakobu ulagilagi wakuyi,

na Israeli malagalira na toza zakuyi.

20 Kumbiti kagatenderandiri hangu maisi gamonga,

wantu wamonga wavimanandiri lagiru zakuyi.

Mmuzyumi Mtuwa Mlungu!