1 Mpikaniri mlandu agu mwenga wantu woseri!

Myambiri likutu mwenga yamlikala pasipanu,

2 mpikiniri mwawoseri, wakulu kwa wapusu,

walunda na wantu wahushu kwa pamuhera.

3 Hayoweri visoweru vya luhala,

hantakuli visoweru vya mahala.

4 Hanyambili likutu kupikinira mesali,

na hantakuliliri shitendawiri kwakutendera zezi.

5 Ntambu gaa ntiri shaka shamadoda,

panzengetwa na ukontola wa wankondu?

6 Wantu wakontola watumbira lunda zawu

walizyuma uvuwa wa ulunda wawu.

7 Kumbiti kwahera muntu yakaweza kukombola makaliru ga yumonga,

ama kumlipa Mlungu hazilila ya ukomu wakuyi,

8 mana hazilira ya makaliru ga muntu ndo makulu nentu.

Kawezandiri kulaviya shintu shoseri shashitosheya,

9 nashimtendi kendeleyi kulikala mashaka goseri,

nakahowa.

10 Yomberi kamanandiri kuwera ata yakana luhala kahowa,

viraa wangalimahala na wazigizigi wagamira.

Woseri awa wawalekera wantu wamonga lunda zawu.

11 Masembi ndo mahala pawu pakulikala ata mashaka goseri

ndo pahala pawu pakulika viyiwuku vyoseri,

tembera panu kwanja waweriti na malambu gawu weni.

12 Ata muntu pakawera na ligoya ntambu gaa,

hakahowi hera handa nkanyama.

13 Awu ndo upeleru wa wazigizigi,

na yawawafata na kujimira visoweru vyawu.

14 Hawalonguziwi handa kondolu mpaka kuzimu,

kuhowa hakuweri mshugaji gwawu.

Wantu yawamguwira Mlungu hawawakolimlima mandawira,

nshimba zawu haziwoleri aku,

na hapeni walikali munumba zyawu zazihelepa.

15 Nakaka Mlungu hakalopoli makaliru gangu,

Hakankomboli kulawa aku kuzimu.

16 Naguligaziya paguwona muntu kalunda,

pota lunda yakuyi payiyongereka nentu na nentu,

17 mana pakahowa hapenikatoli shoseri,

lunda yakuyi hapeni isuluki pasi pamuhera na yomberi.

18 Ata pakalikulaziya mumakaliru aga

nakuzyumirwa toziya ya kuwera na mpatiru,

19 hakaweri pamuhera na wazewi yawamlongoleriti kuhowa,

weni hapeni wawezi kayikuwona gulangala.

20 Muntu yakapananwa ligoya kumbiti kahera mahala,

ndo handa kanyama yakatenduwa.