1 Gwee Mtuwa Mlungu guwasingi awa yawansinga,

guwakomangi awa yawankomanga.

2 Gutoli lusegeyu lwaku na shingiru gundoleri,

gwizi guntangi.

3 Gutoli mgoha na janvia yaku toziya ya yawanfata.

Gung'ambili handa hagundopoli.

4 Wawoni soni na kusonizika,

awa yawanyatira makaliru gangu!

Wawuziwi kumbeli kwa soni,

awa yawafira kuntendera makontola.

5 Waweri gambira miwawi yayigulusiwa na liyega,

pawatugiziwa na malaika gwa Mtuwa Mlungu!

6 Njira yawu iweri ya luwindu, nayayityerebuka,

pawatugiziwa na malaika wa Mtuwa Mlungu!

7 Pota kutenda shoseri wanyambiriti mgomiziwu,

nawambawiriti lirindi su mpatukili.

8 Maagamiziya gawapati womberi kwa vumu,

wagomiziwi mumgomiziwu gwawu weni,

wapatukili amu na kwagamira!

9 Panu neni hanemeleri toziya ya Mtuwa Mlungu,

hafyapiliri toziya yomberi kandopola.

10 Hanimgambiri Mtuwa Mlungu kulawa mumoyu.

"Gwee Mtuwa Mlungu, kwa hera yakawera handa gwenga!

Gwenga guwalopola wanyongi kulawa kwa yawana makakala,

nawahushu na yawahera shinti kulawa mumawoku mwa wapoka."

11 Wantu wakontola walilaviya,

wankumpayira.

12 Wandipa madoda kwa maheri na

neni nsigala muushiwa.

13 Kumbiti womberi pawaweriti walweri,

neni nvaliti mafafa kulanguziya hinginika,

ntabikiti kwa kuleka kuliya.

Nduwiti pawera ng'ong'onaziya mtuwi,

14 handa vilii nimlilira ganja ama mlongu gwangu.

Handa muntu yakadaya kuhowa kwa mawu gwakuyi.

15 Kumbiti neni panguwiti wajojonikiti kunonganonga.

Wajojonika pamuhera kunjongera.

Wantu yaniwamandiri wankomangiti pota kuleka,

pota kwahera yakawaleweleriti.

16 Wajongera na kunigira handa wantu yawammanandiri Mlungu,

wandola na kunkalalira.

17 Gwee Mtuwa Mlungu, hagulolihera mpaka ndii?

Gundopoli kulawa mumakomangu gawu,

gugalopoli makaliru gangu na simba awa.

18 Panu hanongi mayagashi pakati pa lijojoniku likulu lya wantu,

hanikukwisi pakati pa wantu wavuwa.

19 Naguwaleka wankondu awa wadoda wanonginongi,

awa yawankalalira pota likosa, su wanemeleri ntabika yangu,

20 Visoweru vyawalonga vya pongandiri,

walonga visoweru vya udoda kwa yawafira ponga.

21 Wanshitaki kwa liziwu pawalonga,

"Yina! Tugawona twaweni gagutenditi."

22 Kumbiti gwenga Mtuwa Mlungu guwona mlandu agu,

nagunyamala, gwee Mtuwa Mlungu,

nagulika kutali naneni.

23 Gwee Mtuwa Mlungu gugoloki na gunteteyi,

gwizi guloli mirandu yangu.

24 Gwee Mtuwa Mlungu, Mlungu gwangu gunteteyi,

gutendi teratera na uwaminika waku,

naguwaleka wankondu wangu wanonginongi.

25 Naguwaleka walilongeri,

Tupata shatufiriti! Ama walongi.

"Tummalira ayu!"

26 Wasindi woseri na wasoniziwi

awa yawanemelera kutenduwa kwa neni,

wawoni soni na kusonizika.

Awa yawaliwona waheri kuliku neni.

27 Kumbiti yawafira kuwona kuwera nahera likosa,

wabotangi kwa nemeleru walongi mashaka goseri.

"Mtuwa Mlungu ndo mkulu nentu!

Kafiriziwa na mpatiru za ntumintumi gwakuyi."

28 Panu naneni hambweri waminika waku,

hanimbi zyuma zaku paluwala poseri.