1 Mpikiniri mafunda gangu, mwenga wantu waneni,

mpikiniri vyantakula.

2 Hantakuli na mwenga kwa mafumbu,

hantakuli vitwatira vyavififikiti kwanjira makashu,

3 galii gatupikiniriti na kuvimana,

galii gawatugambiriti wazewi wetu.

4 Hapeni tuwafifi wana wetu,

kumbiti hatushitambili shiyuwuku shashiza,

matendu yagafiruwa zyuma kwa Mtuwa Mlungu na uwezu wakuyi,

hatuwagambiri makangashu gakuyi gakatenditi.

5 Kawapananiti lagalira wiwuka wa Yakobu,

katuliti lagiru muisraeli,

zeni kawalagaliti wazewi wetu,

wawafundi wana wawu,

6 su shiyiwuku shashiza wazimani na

wana yanawiwuki,

wazimani na

womberi viraa wawamaniziyi wana wawu.

7 Su wamtulili Mlungu litumbiru lyawu,

nawiza kulwaluwa matendu gakuyi,

su wagakoli malagiru gakuyi.

8 Nawalifana na wazewi wawu,

wantu yawanamtiti na wagalambuka,

weni rohu zyawu ziweritindiri na uaminika kwa Mlungu,

na miyoyu yawu imwaminitindiri.

9 Wantu wa Efuraimu yawapapiti, upindi na misali mumawoku,

wawuyiti kumbeli na kutuga lishaka lilii lya nkondu.

10 Walikolandiri lipatanu lya Mlungu,

walemiti kufata lagiru lyakuyi.

11 Waliyaluwiti mirandu yakatenditi,

mauzauza gakaweriti kawalanguziya.

12 Katenditi makangashu kulongolu kwa wambuyi wawu,

kululalanda lwa Soani muisi ya Misri.

13 Kayibaguliti bahari na kuwapitiziya wantu amu,

kagatenditi mashi gagoloki handa shibambaza.

14 Paluwala kawalongoziya kwa liwundi,

pashiru poseri kwa gulangala gwa motu.

15 Kulii kushiwala kagapantangiti matalabuhi,

kawalandaziya mashi kulawa mumashimatali.

16 Katenditi nshemba zilawi mulitalabuhi na

kanyililiziyiti mashi handa nshemba.

17 Ata hangu wendeleya kumtendera vidoda Mlungu mkulu nentu,

wamgalambukiti Mlungu mkulu kushiwala kulii.

18 Wamjeriti Mlungu ng'anji,

pawafira viboga vyawafiriti.

19 Wamtakula Mlungu pawalonga,

"Hashi, Mlungu kaweza kutupanana shiboga kushiwala?

20 Nakaka, kalikomiti litalabuhi,

mashi gavuwa gabwitula na vishemba vilaviya mashi gavuwa;

ntambugaa kaweza kutupanana shiboga na

kuwapanana wantu wakuyi vinofu?"

21 Mtuwa Mlungu, pakapikiniriti aga, keniti maya nentu

na motu gulawira kwa wiwuka wa Yakobu na

maya gakuyi kwa wantu wa Israeli,

22 toziya wamjimiritindiri Mlungu,

pota kwamini ukombola wakuyi.

23 Ata hangu kagalagalira mawundi ga kumpindi na

kayivugula milyangu ya kumpindi,

24 kawasulusiriti mana su walii,

kawapanana viboga kulawa kumpindi.

25 Wantu waliyiti shiboga sha ntumintumi gwa kumpindi na

yomberi kawajegeriti shiboga shakwikutuziya.

26 Kumpindi kulii kalijegiti liyega lya kwagulawa mshenji na

kalilongoziya liyega lya kusika kwa likakala lyakuyi,

27 kawajegera wantu wakuyi vinofu vivuwa,

wampongu wavuwa handa mhanga gwa kumpwani,

28 wampongu awa watulukiti mukambi mwawu,

wega zoseri kuzyengeta malingu gawu.

29 Wantu waliyiti na kuleka,

toziya Mlungu kawapanana shawafiriti.

30 Pamberi pa kumalira matamata yawu,

shiboga pashiwera mumlomu mwawu,

31 maya ga Mlungu gakalipiti kuusu womberi,

kawalaga yawana makakala muwamu mwawu

na kuwagusiya wantemba wa Israeli.

32 Ata hangu wandeleyiti kutenda vidoda na

waminitindiri makangashu gakuyi.

33 Su, kagadumula mashaka gawu handa pumula,

na vinja vyawu kwa vitiriziwu.

34 Kila pakawalagiti,

yawasigaliti wamwuyira Mlungu,

walekiti vidoda na wamgalambukira Mlungu kwa moyu.

35 Waliholiti handa Mlungu kaweriti litalabuhi lyawu,

Mlungu Mkulu nentu kaweriti mkombola gwawu.

36 Kumbiti wamzyangiti kwa visoweru vyawu,

kila shawamgambiriti shiweriti mpayu.

37 Waweritindiri pamuhera na yomberi kwa moyu,

waweritindiri waminika kwa lipatanu lyakuyi.

38 Kumbiti Mlungu yakana lusungu kwa wantu wakuyi,

kawalekiziya ukontola wawu na

pota kawangamizandiri.

Mala zitangala kagaleweleriti maya gakuyi,

nagawonekana goseri.

39 Kaholiti handa womberi ndo wantu hera,

ndo handa lyega lyalipita na kwagamira.

40 Mala ninga wamgalambukiti kushiwala kulii na

kumkalaziya kulii kushiwala!

41 Wamjeriti Mlungu mala zivuwa,

wamkalaziyiti ayu mananagala gwa Israeli.

42 Waliholitindiri likakala lyakuyi,

pota lishaka lilii pakawalopoliti na wankondu wawu,

43 pakatenditi makangashu muisi ya Misri na

mauzauza kululalanda lwa Soani.

44 Kazigalambuliti nshemba zyawu kuwera mwazi,

su Wamisri nawapata mashi ga kulanda.

45 Kawajegeriti vipinga vya wavinkozi yawawashenyeyiti na

vyuli vihalibisiya

46 Kawatumiti wanjombi, waliyiti viboga vyawu na

na mabwajubwaju gawalimiti.

47 Kahalibisiyiti mizabibu yawu kwa mvula ya mabuwi na

mitini yawu kwa mvula nkulu.

48 Kawatowera wang'ombi wawu mvula ya mabuwi na

kondolu wawu kwa lupanta.

49 Kalekiti maya gakuyi gakalipa gawakalipili,

Maya na shuki na ntabiku,

handa shipinga sha ntumintumi wa kumpindi waagamiziya.

50 Kalekiziyiti maya gakuyi gendereyi,

pota kuwakwepiziya na kuhowa,

ila kawaagamiziyiti kwa tauni.

51 Kawalagiti wiwuka wa kwanja wapalu woseri wa Wamisri,

wiwuka wa kwanja yawuweriti muliringu lya Hamu.

52 Shakapanu kawalaviyiti wantu wakuyi handa kondolu,

kawalongoziya kushiwala handa shipinga sha mifugu.

53 Kawalongoziya kwa uponeru pota watirandiri,

kumbiti bahari iwagibikira wankondu wawu.

54 Kawajegiti muisi yakuyi nanagala,

kulugongu lwakalulopoliti kwa makakala gakuyi.

55 Kagawingiti maisi kulongolu kwawu,

kaziwusiya isi zawu ziweri lunda ya Israeli,

kagatula makabila ga Israeli mukaya mwawu.

56 Ata hangu wamjeriti na kumgalambuka Mlungu Mkulu,

pota wajimirandiri malagalira gakuyi.

57 Kumbiti wagalambukiti na kutenda madoda handa wazewi wawu,

wawegukaweguka handa upindi yawugangamalandiri.

58 Wamkalaziyiti kwa vitalawanda vyawu za wamlungu,

wamsongiziya kawoni weya kwa vinyagu vyawu vya kusongola.

59 Mlungu pakawoniti aga, keniti maya ng'anji,

kamlema Israeli nakamu.

60 Kalekiti liringu lyakuyi Linanagala aku Shilu,

liringu lyeni kalituliti pakatikati pa wantu.

61 Kalekiti lisanduku lya likakala lyakuyi litolwi,

uweru wakuyi utulwi mumawoku mwa wankondu.

62 Kawalaviyiti walaguwi kwa ligumba

kawakalaliriti wantu wakuyi mweni.

63 Motu guwalunguziya wantemba wawu wapalu,

na wahinga wawu wapatandiri wakuwayuga.

64 Watambika wawu wahowiti kwa ligumba,

wadala wawu wawezitindiri kudaya.

65 Shakapanu Mtuwa Mlungu kimuka handa muntu yakalawiti mumpota,

handa shikambaku yakakalamuziwitwi na divayi.

66 Kawawinga na kuwakanka wankondu wakuyi,

kawasoniziya mashaka goseri.

67 Kumbiti kawalemiti wantu wa Yosefu,

pota kulisyagula likabila lya Efraimu,

68 ila kalisyaguliti likabila lya Yuda,

lugongu sayuni lwakalufiriti.

69 Kanyawiti panu Numba Nkulu yakuyi handa migongu,

handa pasipanu yeni yakayigangamiziyiti mashaka goseri.

70 Kamsyaguliti Daudi, ntumintumi gwakuyi,

kamwusiyiti mlihengu lya kuwalolera kondolu.

71 Kamlaviyiti mulihengu lya kuwalolera kondolu na wanakondolu,

kamtenda kaweri mfalumi gwa Israeli,

Kawaloleri wantu wa uhala wakuyi.

72 Daudi kawashunga kwa moyu gwakuyi goseri,

kawalongoziya kwa luhala lukulu.