1 Katekelerwi Mtuwa Mlungu, litalabuhi lyangu,

yakafunda mawoku gangu nkondu,

na vyala vyangu kulikomanga.

2 Yomberi ndo ufiru wangu na liboma lyangu,

shinga yaneni na mlopola gwangu,

yomberi ndo lusegeyu lwangu kwakuyi mpata uponera,

yomberi kagakanka maisi na kugatula pasipaneni.

3 Gwee Mtuwa Mlungu, muntu ndo gaa ata gumsheri?

Muntu yakana shimba ndo shii ata gumloli?

4 Muntu ndo handa pumla hera,

mashaka gakuyi ndo madidini handa lisisi lyalipita.

5 Gwee Mtuwa Mlungu gupanti mpindi zaku, gusuluki pasi!

Guyishing'uli migongu na yeni ilaviyi lyosi!

6 Gumeti, guwapalasiyi wankondu,

gugumi misali yaku, guwatugiziyi!

7 Gutalipisiyi liwoku lyaku kulawa kumpindi,

gundopoli na kumpusiya mumashi gavuwa,

gumpusiyi mumawoku mwa wahenga,

8 yakalonga visoweru vya mpayu,

yakapaya pakalirapa.

9 Hanikwimbili lwimbu lwa syayi, gwee Mlungu,

hanikugomberi lingutinguti lya nyuzi lilongu.

10 Gwenga yaguwapanana wafalumi ukanka,

yagumlopoliti Daudi ntumintumi gwaku, kulawirana na ligumba lya kuhowa.

11 Gundopoli na kuntula lekeru,

kulawa mumawoku mwa wahenga,

weni walonga visoweru vya mpayu,

wapaya pawalirapa.

12 Wantemba wa twenga muwuntemba wawu hawaweri handa shimeru yashisisitawi,

wahinga wetu waweri handa mpanda yazisongolitwi kuherepiziya numba ya mfalumi.

13 Hanja zyetu zimemi viboga vya kila ntambu.

Kondolu wa twenga mumalambu waleri maelufu kwa maelufu.

14 Ng'ombi wetu hawapapi visanka vizotopa,

kwahera yanakaweri lopola.

Kwahera kulira mu njira za miji yetu.

15 Watekelerwa wantu yawapananitwi aga,

watekelerwa weni Mtuwa Mlungu ndo Mlungu gwawu!